Oraldyq oqýshylardyń jobalary respýblıkalyq jáne halyqaralyq baıqaýda úzdik dep tanyldy

ORAL. QazAqparat – Oral qalasyndaǵy Nazarbaev zııatkerlik mektebi oqýshylarynyń ınnovatsııalyq jobalary respýblıkalyq jáne halyqaralyq baıqaýda úzdik dep tanyldy, dep habarlaıdy QazAqparat tilshisi.

«Caspian Startup-2022» halyqaralyq baıqaýy aıasynda alǵash ret respýblıkalyq Demo Day sharasy ótken edi. Halyqaralyq IT startaptar tehnoparki uıymdastyrǵan saıys barysynda NIS oqýshylary úsh aı boıy Astana HUB-ta onlaın oqyp, tálimgerlermen birlese jobalaryn ázirledi. Sodan keıin joba avtorlary Aqtaý qalasynda óz jetistikterin kórsetti.

Demo Day alańynda usynylǵan jobalardyń ishinde Oraldaǵy NIS komandasynyń «NFT-býdılnık L7RK» startapy úzdik dep tanyldy. Komandanyń árbir múshesiniń óz mindetteri bar: Adelıa Shaýkeneva top kóshbasshysy bolsa, Almas Saparov pen Azamat Orazǵalı mobıldi jasaqtaýǵa jaýapty, Ernur Násipqalı – veb-dızaıner jáne frontend, Abylaı Mámetan – analıtık maman.

NFT oıatqyshtyń ereksheligi sol, arnaıy tekseristiń kómegimen erte oıanǵanyn dáleldegen jaǵdaıda baǵdarlama belgilengen tokenderdi qoldanýshy paıdasyna esepteıdi. Ári qaraı paıdalanýshy olardy tsıfrlyq dollarǵa aıyrbastap, keıin bul aqshany basqa vırtýaldy ámııandarǵa aýdara alady.

Jeńimpazdar mobıldi qosymshany ázirleýdi aıaqtap, Astana Hub-tyń BlockChain Battle-da baqtaryn synap kórýdi josparlap otyr. Ul-qyzdardyń jetekshisi, mektep muǵalimi Oral Qydyrshaev mundaı baıqaýlar startap oılap tabý, óz ónimin tanystyrý jáne kompanııalarmen qarym-qatynas ornatýǵa úıretetinin aıtady.

Komandanyń beldi múshesi Almas Saparov «INFOMATRIX-ASIA» halyqaralyq konkýrsynda pnevmonııanyń bar-joǵyn lezde anyqtaıtyn «ChestXRayAl» qosymshasy úshin de altyn medalǵa ıe boldy.

Radıologtarǵa kómek bolatyn baǵdarlamany jasap shyǵarý ıdeıasy avtorǵa pandemııa kezinde kelgen. Ol úshin medıtsınalyq ortalyqtardan jınalǵan 5 800-den astam rentgen túsirilimderin qamtıtyn derekter jıyntyǵyn paıdalana otyryp, vızýaldy keskinderdi taldaý úshin jıi qoldanylatyn konvolıýtsıondy neırondyq jeli oqytyldy.

«Rentgen sýreti arqyly baǵdarlama ókpe qabynýynyń bar-joǵyn 92 paıyz dáldikpen anyqtaıdy. Eger mamandarǵa konsýltatsııa men dıagnostıkaǵa 15 mınýt qajet bolsa, ChestXrayAI jasandy ıntellektiniń arqasynda birneshe sekýnd jetkilikti», – deıdi Almastyń ǵylymı jetekshisi, mektep muǵalimi Borıs Zelenov.

Halyqaralyq baıqaýda Qazaqstanmen birge Túrikmenstan, Tájikstan, Qyrǵyzstan jáne basqa elderden kelgen qatysýshylar óz jobalaryn tanystyrdy.