Oraldyq oqýshy halyqaralyq «Aq kógershin» baıqaýynda birinshi oryndy ıelendi
ORAL. QazAqparat - Oral qalasyndaǵy №4 orta mekteptiń 4-synyp oqýshysy Rasýl Qubashev Astana qalasynda márege jetken HІ halyqaralyq «Aq kógershin» balalar shyǵarmashylyǵy festıval-baıqaýynda birinshi oryndy ıelendi, dep habarlaıdy «QazAqparat» HAA tilshisi.
Osy jańalyqpen bólisken atalmysh mektep dırektory Máýlen Dilmaǵambetovtiń aıtýynsha, Rasýl mánerlep oqý atalymy boıynsha synǵa túsip, ozyp shyqty. Jas daryn Qalqaman Sarınniń «Táýelsizdik» jáne Ǵaısaǵalı Seıtaqtyń «Qazaǵym, qaıda barasyń?» atty óleńin naqyshyna keltire oqydy.
R.Qubashevtiń jetekshisi Arman Bazarov ta úzdik ustaz retinde marapattaldy.
«Bul bizdiń mektebimiz úshin úlken qýanysh bolyp otyr. Rasýl Qubashevtiń aldaǵy dodalarda da oza shabaryna senim mol», dedi M.Dilmaǵambetov.
