Oraldyq mektepte birjynystylar mahabbaty týraly sabaq oqytqandar jazalanady - vıtse-mınıstr
ASTANA. QazAqparat - Oraldyq mektepte birjynystylar mahabbaty týraly sabaq oqytqandar týraly búgin QR Bilim jáne ǵylym vıtse-mınıstri Esenǵazy Imanǵalıev resmı túsinik berdi.
Onyń aıtýynsha, atalmysh oqıǵa keleńsiz jaǵdaı jáne oǵan qalalyq bilim bólimi men muǵalimniń salǵyrttyǵy soqtyryp otyr.
«Barlyq baspasóz quraldary osy máseleni kóterip jatyr. Biz ózimizdiń quzyrymyzda bolǵandyqtan, túsindirip keteıin. Ol jaǵdaı eń birinshi durys túsinispeýshilikten týǵan olqylyq. Úı tapsyrmasyna oqýǵa usynylǵan kitap oqýlyq emes, sabaqtan tys qural. Sondyqtan sabaqtan tys quraldy, muǵalimniń ózi tańdaıdy. Ony tańdaý ádistemelik ortalyqtyń usynysymen jasalady. Sol usynys bergen kezde bir áripten qate ketken. Sıonella Petrova degen avtordyń jazǵany 18 jastan joǵary oqyrmandarǵa oqýǵa arnalǵan shyǵarma. Al bizdiń ádistemelik ortalyq Zoıa Alekseevna Petrova degen aqynnyń ádistemeligin aıtqan. Sondyqtan bastaýysh mekteptegi ustaz Z.Petrovanyń ornyna S.Petrova degen avtordy ınternetten alyp, oqýshylarǵa taratqan. Osy oqıǵaǵa baılanysty bilim berý sapasyn qadaǵalaý ortalyǵynyń mamandary qazirgi ýaqytta atalmysh óńirde tekseris júrgizip jatyr», - dedi ol.
Onyń aıtýynsha, arnaıy qurylǵan komıssııa bul oqıǵaǵa kináli tulǵalardy anyqtap, tıisti jaýapkershilikke tartatyn bolady.
Aıta keteıik, Oraldaǵy bastaýysh synyp oqýshylaryna birjynystylar arasyndaǵy mahabbat týraly ertegi kitaby synyptan tys oqýlyq retinde usynylǵan.
