Oraldyq qutqarýshylar bes jasar balany sýǵa ketýden aman alyp qaldy
ORAL. QazAqparat - Oraldyq qutqarýshylar sýǵa batyp bara jatqan bes jasar balany qutqaryp qaldy, dep habarlaıdy «QazAqparat» tilshisi.
BQO TJ departamenti jedel qutqarý jasaǵynyń bas qutqarýshy-psıhology Láıla Ábdirahmanovanyń aıtýynsha, Shymkent qalasynan kelgen qonaqtar qalalyq mádenıet jáne demalys saıabaǵyndaǵy sý jaǵasynda demalǵan. Kún ystyq bolǵandyqtan, balalar ózenge shomylýǵa túsken. Sol kezde bes jasar bala sýǵa tunshyǵyp, bata bastaıdy. Ózen jaǵalaýynda turǵan ákesi kómekke shaqyrady. 
Jaǵajaıda kezekshilikte júrgen №3 qutqarý bólimshesiniń jetekshisi Márlen Berqalıev pen qutqarýshy Bekjan Aıtqalıev balany sýdan alyp shyǵyp, alǵashqy kómek kórsetip, ata-anasyna tabystady.
Mundaı oqıǵa qalalyq saıabaqta osymen ekinshi ret bolyp otyr. Budan buryn 13 maýsym kúni osy saıabaqta kezekshilik jumystary kezinde qutqarýshy Azamat Qylyshev pen qutqarýshy-medık Aqylbek Saıynov 12 jasar balany sýǵa ketýden aman alyp qalǵan bolatyn.
Aıta keteıik, óńirde úsh kúnnen beri kún ysyp tur. Sondyqtan sýǵa túsýshilerdiń kóbeıetini belgili. Mundaı kezde qaýipsizdik sharalaryn saqtamasa bolmaıdy. Ásirese, balalardy qaraýsyz qaldyrmaý kerek. Oblysta 2015 jyly 29 adam sýǵa ketse, sonyń 13-i - balalar. Ótken jyly 20 adam (9-y - balalar) «tilsiz jaýdyń» qurbany boldy.
