Oraldyq «Kýbleı» kásiporny júzden astam ónim túrlerin shyǵaryp keledi
ORAL. QazAqparat – Oraldyq «Kýbleı» kásiporny júzden astam ónim túrlerin shyǵaryp keledi, dep habarlaıdy QazAqparat tilshisi.
BQO kásipkerlik jáne ındýstrıaldyq-ınnovatsııalyq damý basqarmasy málim etkenindeı, «Kýbleı» JShS 1992 jylǵy qarashada et qalbyrlaryn óndiretin kásiporyn retinde qurylǵan bolatyn.
Qazirgi tańda Talǵat Berekeshev basshylyq etetin kásiporyn aýysymyna 150 myńnan astam joǵary sapaly et qalbyrlaryn shyǵarady. Ónim túrleri 100-den asady. Sonyń ishinde et qalbyrlary, et pen ósimdik qalbyrlary men delıkatester, sondaı-aq teńiz jáne ózen balyǵynan jasalǵan ónim túrleri mol.
2012 jyldan beri kókónis qalbyrlaryn óndirý jolǵa qoıyldy.
2018 jyldan beri kontsentrlendirilgen sútti de óndiretin kásiporyn BUU baǵdarlamalary aıasynda gýmanıtarlyq kómek beretin ónim jetkizýshi retinde tirkelgen. Bul «KAZNEX INVEST» eksport jáne ınvestıtsııalar jónindegi ulttyq agenttiginiń qoldaýy arqasynda múmkin bolyp otyr.
ST RK ISO 9001-2001 jáne ST RK 22000-2006 (HACCP) sapa menedjmenti júıesi engizilgen kásiporynda 500 qyzmetker jumys isteıdi.
Oralǵa qarasty Rybtseh aýdanynda alty gektardaı jerdi alyp jatqan «Kýbleı» JShS et óńdeý kesheniniń jalpy qýaty jylyna 20 myń tonna et óndirýge eseptelgen. Mal soıý (aýysymyna 250 bas iri qara, 1 myńdaı qoı soıýǵa bolady) jáne et óńdeý tsehtary tolyqtaı avtomattandyrylǵan, onda joǵary sapaly eýropalyq jabdyqtar ornatylǵan. Al qazirgi zamanǵy tehnologııaǵa sáıkes túrli temperatýraly rejımdegi 10 tońazytqyshta jylyna 3 myń tonnaǵa deıin etti saqtaýǵa bolady.
Búginde respýblıkada tanymal kásiporynǵa aınalǵan «Kýbleı» JShS-yna memleket tarapynan qoldaý kórsetilip keledi. Aıtalyq, sońǵy úsh jylda «Investıtsııalyq salymdar kezinde agroónerkásiptik keshen sýbektisi shekken shyǵystardyń bir bóligin óteý» bıýdjettik baǵdarlamasy aıasynda 166,7 mln teńge tólendi.
Eske sala keteıik , budan buryn oraldyq kásiporynnyń eksportqa baǵyttalǵan ónim kólemin kóbeıte túspekshi ekendigin jazǵan bolatynbyz.
