Oraldyq kásiporyn eksportqa baǵyttalǵan ónim kólemin kóbeıte túspekshi
ORAL. QazAqparat – «Oral transformator zaýyty» JShS eksportqa baǵyttalǵan ónim kólemin kóbeıte túspekshi, dep habarlaıdy QazAqparat tilshisi.
BQO kásipkerlik jáne ındýstrıaldyq-ınnovatsııalyq damý basqarmasynan alynǵan málimetke qaraǵanda, «Alageum Electric» holdıngtik kompanııasynyń quramyna kiretin zaýyt osy zamanǵy qural-jabdyqtar men ozyq tehnologııa negizinde jumys isteıdi.
«Kentaý transformator zaýyty» AQ-nyń jartyǵasyrlyq tájirıbesin eskere otyryp, joǵary sapaly ónim shyǵarýdy qolǵa alǵan kásiporyn transformatorlarymen tanymal. Álemdik talaptarǵa saı keletin transformatorlar sonymen qatar qoljetimdi jáne básekege qabiletti, baǵasy orta naryqtaǵydan 5-10 paıyzǵa arzan.
«Omega» prıbor jasaý zaýyty» AQ-nyń bos turǵan ǵımarattaryna ornyqqan kásiporynda jylyna 10 myń dana qýaty 6-10 kV retteýshi maıly, qurǵaq jáne tartatyn transformatorlar shyǵarylady. Ónimniń 96 paıyzdaıy Reseıge jóneltiledi.
Zaýyt 2016 jyly túrik ınvestorlarymen birlesip, «URAL ELECTRIC» JShS-ny qurdy. Sonyń negizinde kásipkerlikti qoldaý kartasy aıasynda 2017 jyldyń birinshi toqsanynda jalpy quny 500 mln teńge elektr qalqandy jabdyq óndirildi.
Qazirgi tańda kásiporyn ınvestıtsııalyq jobanyń ekinshi kezeńi – shveıtsarııalyq AVV fırmasynyń lıtsenzııasy negizinde Reseı naryǵyna baǵyttalǵan shkaf buıymdaryn óndirýge kiristi.
Ótken jyly 7140,2 mln teńgege 7559 dana transformator shyǵarylǵan bolatyn. Bıylǵy tórt aıdaǵy ónim kólemi 2,3 mlrd teńge turatyn 2509 dana transformatordy qurady.
Jalpy, eksportqa baǵyt ustaǵan kásiporyn óndiristi keńeıtý úshin 4 mlrd teńge ınvestıtsııa quıýdy oılastyrýda. Joba aıasynda jylyna 300 dana qýaty 6 – 10 – 20 kV qurǵaq transformator, sondaı-aq jylyna 200 dana qýaty 6 – 10 – 20 kV betondy podstansa shyǵarý kózdelýde.
Zaýyttyń basqarýshy dırektory Aqjol Saýranbaevtyń aıtýynsha, kásiporynda barlyǵy 350 adam eńbek etedi.
«Kásiporyn karantın kezinde de óndiristen qol úzbeı, 40 paıyz qýatyna jumys istedi. Qazir kishkene arttyryp keledi. Karantın bitip, Reseımen baılanys qaıta jandansa, qalypqa túsemiz dep oılaımyz», dedi QazAqparat tilshisine A.Saýranbaev.
Eske sala keteıik, budan buryn Oral transformator zaýytynyń qıyn jaǵdaıǵa tap bolǵan otbasylarǵa 2,5 mln teńge bólgenin jazǵan bolatynbyz.
