Oraldyq kásipker kópbalaly anaǵa páter kiltin tabys etti

ORAL. QazAqparat – Oraldyq kásipker Alek Kýbeev qalaǵa qarasty Krýgloozernyı kentinde turatyn Gúldarııa Aımuqashevaǵa páter kiltin tabys etti, dep habarlaıdy QazAqparat tilshisi.

Bul alty balany tárbıelep otyrǵan jalǵyz basty ana úshin tosyn syı boldy.

«OralZemTrýbServıs» JShS (dırektory Alek Kýbeev) Krýgloozernyı kentinde úsh qabatty 40 páterlik turǵyn úıdi salyp bitirgen bolatyn. Mine, osy úıden eki bólmeli páter G.Aımuqashevaǵa berildi.

Qurylysy 1,5 jylǵa sozylǵan, kirpishten salynǵan úı avtonomdy jylytylady. Páterleri keń de jaryq.

«Biz kóp balaly analardyń birine júrek qalaýymyzben osyndaı syı jasaýdy uıǵardyq. Kent ákimdigi alty otbasynyń tizimin berdi. Solardyń ishinde ózi jetimder úıinde ósken alty balanyń anasyna tańdaý tústi», deıdi Alek Tynymgereıuly.

Oral qalalyq máslıhatynyń hatshysy Aqqalı Áýbekerovtiń aıtýynsha, búginde kent halqy kóbeıip, turǵyn úıler salynýda. Aldaǵy ýaqytta atalǵan qurylys kompanııasynyń bastamasymen balabaqsha qurylysy da bastalmaqshy.

Jańa páterge ıe bolǵan Gúldarııa Tólegenqyzy kásipkerge rızashylyǵyn bildirdi.

«Bala kútimimen otyrǵandyqtan, ózim jumyssyzbyn. Qaıyrymdy jandardyń barshasyna alǵysymdy aıtamyn», dedi ol.

Krýgloozernyı aýyldyq okrýgi ákiminiń orynbasary Tatıana Sýmkınanyń sózine qaraǵanda, A.Kýbeev karantın ýaqytynda muqtaj otbasylarǵa, múgedek jandarǵa qolushyn sozyp keledi.