Oraldyq qalamgerdiń saıası qýǵyn-súrgin qurbandaryna arnalǵan kitaby jaryq kórdi
ORAL. QazAqparat - Oraldyq qalamger, Qazaqstan Jazýshylar odaǵynyń múshesi, BQO sotynyń qyzmetkeri Amankeldi Shahınniń Oraldaǵy «Polıgrafservıs» JShS baspahanasynan «Qorǵaımyn!» dep qazaqty...» atty jańa kitaby jaryqqa shyqty, dep habarlaıdy «QazAqparat» tilshisi.
Oblystyq sottyń baspasóz qyzmetinen túsken málimetke qaraǵanda, bul kitap - avtordyń 2002 jyly Oraldyń «Dastan» baspa-polıgrafııa korporatsııasy» AAQ baspahanasynan basylyp shyqqan «Sol bir súrgin» tarıhı-derekti, pýblıtsıstıkalyq shyǵarmasynyń tolyqtyrylǵan nusqasy. 1937 jylǵy japaı qýǵyn-súrginniń 80 jyldyǵyna oraı jańǵyrtylyp, jańa atpen shyqqan bul týyndyda ólke tarıhynyń aqtańdaq betteriniń eleýli oqıǵasy jan-jaqty qozǵalady. Kezinde qoǵamdyq serpilis týǵyzyp, qalyń oqyrman serpilispen, jyly qabyldaǵan jáne derekteri búginde ǵylymı aınalymǵa jol tartqan shyǵarmada Uly Otan soǵysy qarsańynda Jalpaqtal óńirinde qurylyp, soǵys bastalǵan jyly tutqyndalǵan «Qazaq halqyn qorǵaýshylar odaǵy» dep atalatyn jasyryn jastar uıymynyń astyrtyn qyzmeti men jazalanyp, Keńester Odaǵy tusynda saıası qýǵyn-súrgindi bastan ótkergen uıym músheleriniń qıly taǵdyry, kitap jaryqqa shyqqannan keıin bozdaqtardy máńgi este qaldyrý baǵytynda atqarylǵan naqty is-sharalar baıandalady.
Kitaptyń jańa nusqasynda Jalpaqtal oqıǵasyna qatysty merzimdik basylymdarda jaryq kórgen únqatystar men oıbólisýler, ult ulandarynyń urpaqtary, jerlesteri men aǵaıyn týysqandarynyń estelikteri, bastapqy ǵylymı jobalar men izdenister, shyǵarmanyń asa tartysty jaǵdaıda jaryqqa shyǵýynyń tarıhy, keıipkerlermen hat alysýlar jáne basqa materıaldar bar. Kitapta ult-azattyq qozǵalysyna táýelsizdik turǵysynda baǵa berýdiń jańa metodologııasyn paryqtaýǵa jeteleıtin sony kózqarastar da aıtylady.
«Qazaq halqyn qorǵaýshylar odaǵy» uıymy týraly derektiń 2007 jyly Qazaqstan Respýblıkasynyń Bilim jáne ǵylym mınıstrliginiń bekitýimen 11 synypqa arnalǵan «Qazaqstan tarıhy» oqýlyǵyna enip, ólketanýdyń qosymsha pán saǵatyna qosylýy bul shyǵarmaǵa suranysty ulǵaıta túskendigi eskerilip, týyndy «Qorǵaımyn!» dep qazaqty...» degen ataýmen oqyrmanǵa qaıtadan jol tartyp otyr.
