Oraldyq eriktiler elorda kúnine oraı maskalar men táttiler taratty

ORAL. QazAqparat – Oraldyq eriktiler elorda kúnine oraı qala turǵyndary men qonaqtaryna medıtsınalyq maskalar men táttiler taratty, dep habarlaıdy QazAqparat tilshisi.

BQO jastar saıasaty máseleleri basqarmasynyń qoldaýymen «Oral jastary», «Jas Otan» JQ, «Aqjaıyq jastary», «Jasyl el» jáne «Stýdenttik qurylys jasaǵynyń» eriktileri bul sharany karantın talaptaryn saqtaı otyryp, atqardy.

«Bala-shaǵamyzben ata-anamyzdyń úıine bara jatqanbyz. Aıaldamada tursaq, jastar kelip, maskalar men shokolad usynyp, elorda kúnimen quttyqtap jatyr. Uıymdastyrýshylarǵa rahmet, tosyn syı boldy, ásirese, kishkentaılar qýanyp qaldy. Elimiz indetten tezirek qutylyp, merekelerdi barsha halyq bolyp toılaýdy jazsyn!», - dedi qala turǵyny Jansaıa Aıapbergenova.

«Elorda merekesine oraı osyndaı tosyn syı jasaýdy Batys Qazaqstan oblysy ákimdigine usynǵan bolatynbyz. Ákimdik qoldap, sharamyzdy tańǵy saǵat 09.00-de bastadyq. Qalanyń barlyq aıaldamalaryn qamtýǵa tyrysyp jatyrmyz. Merekelik quttyqtaýlardy keshki saǵat 19.00-de taǵy jalǵastyratyn bolamyz», - dedi «Oral jastary» volonterlik qozǵalysynyń jetekshisi Dýlat Júsipqalıev.

Eske sala keteıik, budan buryn Oralda oraldyq eriktilerdiń ardagerlerdi elorda kúnimen quttyqtaǵanyn jazǵan bolatynbyz.