Oraldyq áıel 6-qabattan sekirmek boldy

ORAL. QazAqparat – Oralda 35 jastaǵy áıel altynshy qabattan sekirip ketpek boldy, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkenindeı, oqıǵa 27 qazan kúni shamamen saǵat 01.37-de D.Qonaev shaǵynaýdany 60-úıde boldy.

Azamattyq nekedegi kúıeýimen sózge kelgen 1986 jylǵy áıel balkonnan sekiremin dep qorqytqan. Sol sátte aıaǵy taıyp ketip, qulap bara jatqan áıeldi kúıeýi ustap úlgerip, qutqaryp qalǵan.

Atalǵan áıelmen profılaktıkalyq maqsatta áńgime júrgizildi.

Sonymen qatar bul otbasynyń jaldamaly páterde tirkeýsiz turatyny anyqtaldy. Soǵan baılanysty jalǵa berýshi men jalǵa alýshyǵa qatysty QR Ákimshilik quqyqbuzýshylyq kodeksiniń 493 jáne 492-baptaryna sáıkes hattama toltyryldy.

Eske sala keteıik, budan buryn BQO-da ýchaskelik polıtsııa ınspektorynyń mal urlady degen kúdikpen ustalǵanyn jazǵan bolatynbyz.