Oraldyń qaýipti tustarynda 27 shaqyrymǵa jýyq bóget bıiktetilip jatyr
ORAL. KAZINFORM — Sý tasqynyna baılanysty Oral qalasynyń qaýipti aýmaqtarynda jalpy uzyndyǵy 26,9 shaqyrym bóget bıiktetilip jatyr.
Oral qalasy ákimdiginen málim etkendeı, bul jumysqa 6 myńnan astam adam jumyldyryldy.
Jergilikti atqarýshy organ, tótenshe jaǵdaılar jáne áskerı qyzmetkerlermen birge qala turǵyndary men eriktiler sý tasqynyna qarsy jumysqa erekshe úles qosýda.
«Bógetti nyǵaıtý, qorǵanys úıindilerin salý boıynsha 500 tehnıka eki aýysymda 15 qaýipti ýchaskede jumys jasaýda. Sonyń ishinde basqa óńirlerden kómekke kelgen 300-deı arnaıy tehnıka tartyldy. Jaǵalaýdy bekitý úshin „Oral trans“ óndiris tsehynyń aýmaǵynda qapshyqtar daıyndalyp jatyr. Myńdaǵan adam qapshyqtardy qummen toltyrý jumysyna atsalysýda. Kúnine shamamen 40 myńdaı qapshyq ázirlenip, qajetti jerlerge jetkiziledi. Kúni búginge deıin sý tasqynyna qarsy jumysqa 900 myńnan astam qapshyq paıdalanylǵan» dep habarlady vedomstvodan.
Qazirgi tańda oblys ortalyǵynda 10 evakýatsııalyq pýnktte 2 myńnan astam turǵyn ornalastyrylǵan.
Oǵan qosymsha 3 myń oryn ázirlendi.
Qala ákimdiginen túsken málimetke qaraǵanda, sý tasqyny saldarynan zardap shekkenderge keltirilgen zııandy esepteý jáne óteý jónindegi komıssııaǵa turǵyndardan ótinishtiń kóp túsýine baılanysty qosymsha taǵy 4 oryn ashyldy.
Buǵan deıin «Teń qoǵam» ortalyǵy (M.Yqsanov kóshesi, 46/1) ǵana jumys istep kelse, kúni búgin mamandandyrylǵan halyqqa qyzmet kórsetý ortalyǵynyń «Ashyq ákimdik» sektory (Jáńgir han kóshesi, 160), oblystyq halyq shyǵarmashylyǵy ortalyǵy (Gagarın kóshesi, 105/3), Derkól kenti ákimdigi (Dal kóshesi, 38) jáne Oral qalasynyń mansap ortalyǵynda (Qurmanǵazy kóshesi, 173a) turǵyndardan ótinish qabyldanyp jatyr.
Eske sala keteıik, budan buryn sý tasqynyna baılanysty BQO-da apattyq-qutqarý jumystaryna 8 200-den astam adam jumyldyrylǵanyn jazǵan edik.
