Oraldyqtar 4 halyqaralyq baǵytqa qatynaı alady

ORAL. KAZINFORM — Mánshúk Mámetova atyndaǵy Oral halyqaralyq áýejaıynan kóktem-jaz kezinde Astana, Almaty jáne Aqtaýǵa qatynaıtyn reıster sany artady.

«Oral halyqaralyq áýejaıy» JShS-nyń baspasóz qyzmetinen málim etkenindeı, 25 qazanǵa deıin sozylatyn jazǵy navıgatsııa kezeńinde áýejaı jolaýshylaryna 6 ishki jáne 4 halyqaralyq baǵyt qoljetimdi bolady. 

Aıtalyq, 3 maýsymnan Shymkentke ushý qaıta bastalady, reıster aptasyna eki ret, seısenbi jáne senbi kúnderi josparlanǵan. Sondaı-aq Túrkistanǵa reıster jalǵasady. Reısterdi aptasyna eki ret, sársenbi jáne senbi kúnderi Scat áýekompanııasy júzege asyrady. Eń tanymal jazǵy baǵyttardyń biri Aqtaý qalasyna da reıster sany artady. Qazirgi ýaqytta Oral qalasynan Kaspıı teńiziniń jaǵalaýyna aptasyna úsh ret ushýǵa múmkindik bolsa, jazda reıster sany beske deıin jetedi.

Kompanııa málimetine qaraǵanda, 20 mamyrdan bastap Astana men Almatyǵa reıster sany birtindep kóbeıedi. Qazir bul qalalarǵa jolaýshylar kún saıyn ushady. Jaz boıy taǵy 7 qosymsha reıs engiziledi. 

— Osy kóktem-jaz maýsymynda Oral áýejaıynda tórt halyqaralyq baǵyt qoljetimdi bolady. Bul Maındaǵy Frankfýrtqa turaqty reıs, Sharm-el-Sheıh pen Antalııaǵa ushatyn charterlik reıster. Scat áýekompanııasynyń Boeing-737 ushaǵy mysyrlyq Sharm-el-Sheıhke jetkizse, FlyArystan áýekompanııasynyń Airbus A320 pen Scat áýekompanııasynyń ushaqtary túrik jaǵalaýyna alyp barady. Bıylǵy jazǵy maýsymdaǵy jańa baǵyt — reseılik Iraero áýekompanııasy oryndaıtyn áıgili Sochı kýrortyna ushatyn reıs. Birinshi reıs 5 maýsymǵa josparlanǵan. Ótken jylmen salystyrǵanda, Oral áýejaıynan ushý qarqyndylyǵy óspekshi, — dep habarlady vedomstvodan.

Eske sala keteıik, budan buryn Oral áýejaıynan qatynaıtyn reıster sany artatynyn jazǵan edik.