Oraldyq turǵyndar týrıstik fırmadan 5 mln teńge óndirip aldy

ORAL. KAZINFORM — Oral qalalyq № 2 sotynda týrıstik fırmaǵa qatysty is qaraldy. BQO sotynyń baspasóz qyzmetinen málim etkenindeı, 2024 jyly tamyzda Oral qalasynyń turǵyny týrıstik fırma arqyly Taılandqa 1 mln 082,358 myń turatyn joldama satyp alǵan. Sondaı-aq buǵan onyń tórt dosy da qosylǵan. Barlyǵy bes adam «Geografııa» JK arqyly joldama alǵan.

Keıin týragent týroperatordyń júıesindegi qatelikke baılanysty qujattar rásimdelmegenin aıtyp, qarjyny qaıtaramyn dep ýáde etken. Jábirlenýshiler kelisim-shartty buzyp, qarjyny qaıtarýdy ótingenimen, jaýap kelmegen. 

Týrıstik fırma ókili onlaın-májiliske qatyspady. 

— Sot atalǵan JK-men kelisim-shartty buzyp, jábirlenýshilerdiń paıdasyna mynadaı somany óndirý týraly qaýly shyǵardy. Úsh jábirlenýshiniń árqaısysyna 1 mln 081,211 teńge, ókildiń qyzmeti úshin 108 myń, notarıýsqa tólem retinde 4 061 teńge, 10 812 teńgeden memlekettik baj salyǵyn óndirdi. Tórtinshi turǵynǵa 662,5 myń teńge, 6 640 teńge memlekettik baj salyǵy, besinshi adamǵa 662,5 myń teńge men 6 640 teńge baj salyǵyna qosa ókildiń qyzmeti úshin 63 myń teńge, barlyǵyn qosqanda, 5 jábirlenýshige 5 mln teńge óndirildi, — dep habarlady vedomstvodan.

Eske sala keteıik, budan buryn BQO turǵyny 11 mln teńge páter qunyn sot arqyly óndirip alǵanyn jazǵan bolatynbyz.