Oraldyq sarbaz Aqtaýda ant qabyldaý kezinde súıiktisine usynys jasady
AQTAÝ. KAZINFORM — Aqtaý qalasynda ótken Ulttyq ulan sarbazdarynyń áskerı ant qabyldaý rásimi erekshe oqıǵamen este qaldy.
QR Ulttyq ulany «Batys» óńirlik qolbasshylyǵynyń baspasóz qyzmetinen málim etkenindeı, 200-den astam jas jaýynger ant berse, solardyń ishinde Oral qalasynyń týmasy Artýr Sársenǵalıev úshin bul kún asa mańyzdy boldy.
Ol saltanatty rásim barysynda súıiktisi, oraldyq Gúlnazǵa kópshilik aldynda turmysqa shyǵýǵa usynys jasady.
Gúlnaz esh oılanbastan:
— Iá, — dep jaýap berdi.
Bul aıryqsha oqıǵa jınalǵandardyń júregine jylylyq uıalatty.
— Men úshin bul kúnniń máni erekshe. Áskerı ant qabyldaý — ár sarbazdyń ómirindegi jaýapty sát. Al osy kúni súıiktime usynys jasap, onyń kelisimin alý — men úshin úlken baqyt. Gúlnaz meniń ómirimdegi eń qymbat adam, endi men tek Otanǵa ǵana emes, oǵan da adal bolýǵa ýáde beremin, — dedi Artýr tolqyp turyp.
Osylaısha, qatardaǵy jaýynger Artýr Sársenǵalıev mańyzdy sheshim qabyldap, súıiktisimen birge jańa ómirge qadam basty.
Eske sala keteıik, budan buryn Ulttyq ulan jaýyngeri memlekettik marapat jaýapkershilikti eseleı túsetini týraly aıtqanyn jazǵan bolatynbyz.