Oraldy qorǵaý úshin BQO-ǵa taǵy 500 áskerı men qutqarýshy barady
ASTANA. KAZINFORM — 21 sáýir kúni tańerteń Jaıyq ózenindegi sý deńgeıi qaýipti mejeden asyp, 8,5 metrdi qurady. Ózen jaıylmasynda ornalasqan saıajaı alaptary sý astynda qalyp, Jaıyq jáne Shaǵan ózenderiniń mańyndaǵy shaǵyn aýdandarǵa sý keldi.
Oral qalasynda sý tasqynyna qarsy is-sharalar kúsheıtilgen rejımde júrip jatyr.
Qorǵanys qurylystaryn nyǵaıtý sharalaryna oblys boıynsha 10,6 myńnan astam adam jáne qala boıynsha 6,4 myń adam, sondaı-aq Qazaqstannyń basqa óńirlerinen tartylǵan 2 myńnan astam tehnıka jumyldyrylǵan.
Vıtse-premer Qanat Bozymbaev sý tasqynyna qarsy turý úshin Mańǵystaý, Aqtóbe oblystarynan, Astana men Almatydan taǵy 500 áskerı qyzmetshi men qutqarýshyny BQO-ǵa jiberýdi tapsyrdy.
TJM jáne Qorǵanys mınıstrligi jelisi boıynsha 200 adam Oralǵa kelip, jumysqa kiristi.
Qanat Bozymbaev Oraldyń perımetrindegi sý tasqynyna qarsy qorǵanys qurylystaryn tekserdi.
Sý tasqynynyń sharyqtaý shegi áli alda dep kútilip otyr.
Osyǵan baılanysty vıtse-premer tasqyn qaýpi bar aımaq ózenderiniń boıyndaǵy jer bógetterin taǵy birneshe metrge kóterýdi tapsyrdy.
BQO aýyldarynda jaǵdaı turaqty jáne baqylaýda.
Sý tasqyny kezeńi bastalǵaly óńirdegi Jaıyq jáne Shaǵan ózenderiniń boıynda 136 shaqyrymnan asatyn bóget salyndy.
Onyń ishinde Oral qalasynda osyndaı bóget 45 shaqyrymǵa jetti.
Eske sala keteıik, budan buryn Oral qalasynda Jaıyqtaǵy sý deńgeıi qaýipti shekten asyp ketkenin jazǵan bolatynbyz.
Oral qalasy tóńireginde saıajaılar sýǵa ketip jatyr.
BQO TJ departamenti sý basqan aýmaqtarda qalý qaýipti ekenin eskertti.
Oral saıajaılarynan adamdar májbúrli túrde kóshirilip jatyr.
