Oraldan bastalǵan «Ashyq alań - 2050» jobasy basqa oblystarda da jalǵasady - Mankeev

ORAL. QazAqparat - Bizdiń maqsatymyz - «Rýhanı jańǵyrý» baǵdarlamasyn júzege asyrý maqsatynda pikir almasatyn ashyq alań qurý. Bul týraly búgin Oral qalalyq mádenıet jáne demalys saıabaǵynda ótken «Rýhanı jańǵyrý - keleshektiń kepili» atty sharada «Qazaqstan - 2050» qozǵalysy» keńesiniń tóraǵasy, QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııa múshesi Muhtar Mankeev málim etti, dep habarlaıdy «QazAqparat» tilshisi.

Onyń aıtýynsha, zamanaýı kommýnıkatsııalyq quraldar arqyly, qoǵammen birige otyryp, túrli býyn ókilderiniń oıyn   bilý arqyly jańa jobalar izdestiriletin bolady. «Tizimge kirmeı qalǵan mańyzdy jobalar bolsa, solarmen jumys jasap, nátıjesin kórýge umtylý kerek. Elbasymyz Qazaqstannyń álemniń eń damyǵan otyz eliniń qataryna qosylýyn maqsat etip qoıǵany belgili. Sondyqtan bul bıik mejege jetý úshin tek memlekettik uıymdar ǵana emes, búkil qoǵam músheleri birigip jumystanýy kerek. Osyǵan oraı eldiń pikirin, usynysyn tyńdaýǵa keldik. «Týǵan jer», «100 jańa esim», «Ulttyq kod» jáne basqa baǵyttar boıynsha tyń jobalar bolsa, birge talqyǵa salamyz. Oral qalasynan bastaý alǵan «Ashyq alań - 2050» jobasy basqa oblystarda da jalǵasyn tappaq. Keıin barlyq jumys qorytyndylanyp, halyqtyń usynys-pikirleri negizinde naqty jobalar jasalatyn bolady», dedi M.Mankeev.

Sharaǵa Batys Qazaqstan oblysyndaǵy «Aıalaǵan alaqan» qoǵamdyq qorynyń jetekshisi Rada Haırýsheva, Astana qalasy azamattyq keńesiniń tóraǵasy, kásipker Tımýr Іlııasov qatysyp, qoǵamnyń rýhanı jańǵyrýy baǵytyndaǵy óz oı-pikirlerimen bólisti. Sondaı-aq óńir ardagerleri jańa bastamaǵa sáttilik tilese, jastar ókilderi óz usynystaryn ortaǵa saldy.

Erkin formatta ótken mundaı kezdesýler aldaǵy ýaqytta da jalǵasyn tabatyn bolady.