«Oraldan Astrahanǵa deıin» atty halyqaralyq ekspedıtsııany ótkizý kózdelýde
ORAL. QazAqparat - Bıylǵy shilde aıynda «Oraldan Astrahanǵa deıin» atty halyqaralyq ekspedıtsııa ótkizý josparlanýda, dep habarlaıdy QazAqparat tilshisi.
Búgin óńirlik kommýnıkatsııalar qyzmetinde BQO mádenıet, arhıvter jáne qujattama basqarmasynyń basshysy Qadyrbolat Musaǵalıevtiń málim etkenindeı, ekspedıtsııa aıasynda respýblıkalyq ǵylymı-tájirıbelik konferentsııa, respýblıkalyq dombyrashylar saıysy jáne Qurmanǵazy kúılerin oryndaý boıynsha sheberlik saǵaty ótedi.
Bıyl kúı atasy Qurmanǵazy Saǵyrbaıulynyń týǵanyna 195 jyl tolatyny belgili. Soǵan oraı óńirde mamyr aıynda «Dombyra kúni» sharasy da ótedi. Oǵan 1500 mektep oqýshysy qatysyp, bir mezgilde uly kúıshiniń týyndysyn oryndaıdy.
Basqarma basshysy Aqjaıyq aýdanynda belgili ánshi, termeshi, Qazaqstannyń eńbek sińirgen ártisi Qalamqas Orashevaǵa arnalǵan «Kómeıinde kúmis jyr» atty jyrshy, termeshi qyz-kelinshekterdiń ІV respýblıkalyq baıqaýy bıyl da jalǵasyn tabatynyn jetkizdi.
«Ánshi-kompozıtor Jaskeleń Ǵaısaǵalıevtiń ánderin oryndaýshylardyń baıqaýy alǵash ret uıymdastyrylmaqshy. Sonymen qatar oblystyq mádenıet qyzmetkerleriniń forýmy, Jańaqala aýdanynda Jaıyq óńiriniń daraboz kúıshileri Mámen Erǵalıuly men Qalı Jantileýovke arnalǵan «Qalı-Mámen - kúmbir kúı» atty oblystyq dombyrashylar baıqaýy, Bókeı ordasynda Qurmanǵazynyń mereıtoıyna arnalǵan respýblıkalyq dombyrashylar baıqaýy jáne basqa aýqymdy is-sharalar ótedi», dedi Qadyrbolat Musaǵalıev. 
