Oraldan Antalıaǵa 14,5 mln teńgeni zańsyz alyp ótpek bolǵan jolaýshy toqtatyldy

ASTANA. QazAqparat – «Oral-Antalıa» halyqaralyq reısimen ketip bara jatqan jolaýshylardy baqylaýdy júzege asyrý barysynda EAEO elderiniń biriniń azamaty ustaldy. Bul týraly Memlekettik kirister komıtetiniń baspasóz qyzmeti málim etti, dep habarlaıdy QazAqparat.

«21.09.2022 jyly Batys Qazaqstan oblysy boıynsha Memlekettik kirister departamentiniń «Oral-KRO» keden beketiniń qyzmetkerleri QR UQK Shekara qyzmetimen birlesip «Oral-Antalıa» halyqaralyq reısimen ketip bara jatqan jolaýshylardy baqylaýdy júzege asyrý barysynda EAEO elderiniń biriniń azamatyn ustady.

Ustaý kezinde 14,5 mln teńge somasynda qolma-qol aqsha qarajaty anyqtaldy (bul – QR Ulttyq Bankiniń 21.09.2022 j. baǵamy boıynsha 30 318 dollar). Tártip buzýshy osy aqshany zattarymen birge polıetılen paketke salyp júrgen. Oǵan Qazaqstan Respýblıkasynyń zańnamasyna sáıkes ákimshilik jazalaý sharalary qoldanyldy», - delingen baspasóz málimdemesinde.

Aıta keteıik, EAEO Keden kodeksiniń normalaryna sáıkes, keden organyna jolaýshylarǵa arnalǵan kedendik deklaratsııasyn usynǵan kúni qoldanysta bolatyn valıýta baǵamy boıynsha 10 myń AQSh dollaryna balama somadan asatyn qolma-qol aqsha qarajatyn jáne (nemese) jol chekterin Odaqtyń kedendik aýmaǵyna bir ýaqytta ákelý nemese Odaqtyń kedendik aýmaǵynan bir ýaqytta áketý kezindegi qolma-qol aqsha qarajaty jáne (nemese) jol chekteri kedendik deklaratsııalaýǵa jatady.

Sondaı-aq, QR Ulttyq Banki shyǵaratyn affınırlengen altynnyń 5, 10, 20, 50 jáne 100 gramm altyn quımalaryn, altynnan jasalǵan «ALTYN BARYS» pen kúmisten jasalǵan «KÚMIS BARYS» ınvestıtsııalyq monetalaryn, 100 gramnan astam affınırlengen altyndy áketýge tyıym salynady.