Oraldan Almatyǵa jolǵa shyqqan poıyz buzylyp, Qaraǵandy oblysynda toqtap qaldy
NUR-SULTAN. QazAqparat - «Jolaýshylar tasymaly» AQ «Oral – Almaty-2» baǵytyndaǵy №52 jolaýshylar poıyzynyń nege toqtap qalǵanyn túsindirdi, dep habarlaıdy QazAqparat kompanııanyń baspasóz qyzmetine silteme jasap.
5 aqpan kúni saǵat 21.07-de «Oral – Almaty-2» baǵytyndaǵy №52 jolaýshylar poıyzy tehnıkalyq aqaýǵa baılanysty «Qaraǵandy – Aǵadyr» (Qaraǵandy oblysy) ýchaskesiniń «Nildi – Aısa» aralyǵynda toqtap qaldy.
«Jóndeý jumystaryn júrgizý úshin 182 jolaýshy kele jatqan, quramynda 29 vagony bar jolaýshylar quramyn Qaraǵandy stansasyna qaıtarý týraly sheshim qabyldanǵan. «Oral – Almaty-2» qatynasyndaǵy №52 jolaýshylar poıyzynyń ary qaraı júrýi sonymen toqtady. Atalǵan aqaý poıyz qozǵalysynyń qaýipsizdigine áser etýi múmkin edi. Aqaý eki vagon aralyǵynan tabylyp otyr. Ony «QR-daǵy Patentes Talgo S.L.» ıspandyq kompanııanyń merdiger uıymynyń mamandary joıady» delingen habarlamada.
«Oral – Almaty-2» qatynasyndaǵy №52 jolaýshylar poıyzy Qaraǵandy stantsııasyna shamamen 11:30-da keledi.
«Qaraǵandy stantsııasyna kelgennen keıin №52 poıyz jolaýshylary «Jolaýshylar tasymaly» AQ bılet kassalarynan jol júrý qujattarynyń 100% qunyn óndirip ala alady. Sondaı-aq Almatyǵa jol tartqan jolaýshylarǵa «Qostanaı-Almaty-1» qatynasyndaǵy № 44 jáne «Nur-Sultan-Nurly jol-Almaty-2» qatynasyndaǵy jolaýshylar poıyzyna minip, saparyn jalǵastyra alady» dep málim etti kompanııadan.
Quram toqtap turǵan ýaqytta jolaýshylar poıyzdyń vagon-meıramhanasynda ystyq tamaqpen qamtamasyz etiledi. Oryn alǵan jaǵdaı barlyq quzyrly qurylymdardyń jiti baqylaýynda.
«Jolaýshylar tasymaly» AQ keltirilgen qolaısyzdyq úshin keshirim ótinip, túsinistik pen shydamdylyq tańytqan jolaýshylarǵa alǵys aıtady.
