Oraldaǵy jármeńkede segiz júzden astam bos jumys oryndary usynyldy
ORAL. QazAqparat - Batys Qazaqstan oblystyq qazaq drama teatrynda jastardy jumyspen qamtýdy kózdeıtin bos jumys oryndarynyń kezekti jármeńkesi ótti, dep habarlaıdy «QazAqparat» tilshisi.
BQO jastarmen jumys jónindegi resýrstyq ortalyq jetekshisi Merjan Ábilqastyń aıtýynsha, bıyl osymen úshinshi jármeńke uıymdastyrylyp otyr. Bul joly Oral qalasy men oblys aýdandarynan 48 jumys berýshi qatysty. Jármeńkede qarapaıym jumysshydan bastap basqarýshy qyzmetkerlerge deıin 868 bos jumys orny usynyldy.
Jármeńkege negizinen stýdentter men túrli oqý oryndaryn bir-eki jyl buryn bitirgen jastar keldi. Jumys berýshilerdiń sózine qaraǵanda, arnaýly oqý oryndaryn bitirgenderdiń ózi jalaqysy joǵary qyzmetke turǵysy keledi. Mundaı qyzmettiń birden tabyla qoıýy, árıne, qıyn. Degenmen jármeńkede qaladan ǵana emes, aýdandardan da bos jumys oryndarynyń usynylýy tańdaý aıasyn keńeıtti.
Sonymen qatar jármeńke aıasynda sheberlik saǵattary uıymdastyryldy. Mysaly, «Atameken» ulttyq kásipkerler palatasy óńirlik fılıalynyń mamandary jastarǵa óz isin qalaı bastaý kerektigi týraly keńes berdi. Taǵy bir sheberlik saǵatynda tyńdaýshylar jumyspen ornalasýǵa múmkindik beretin ózin-ózi tanystyrý, túıindemeni jasaý, áńgimelesýden ótý joldary jóninde maǵlumattar aldy.
