Oraldaǵy Zachagan kenti sýsyz qaldy
ORAL. QazAqparat – Oralda káriz kollektoryndaǵy apat saldarynan Zachagan kenti sýsyz qaldy, dep habarlaıdy QazAqparat.
«Batys sý arnasy» JShS-nyń baspasóz qyzmetinen túsken málimetke qaraǵanda, keshe saǵat 18.30 shamasynda Zachagan kentindegi Ázerbaıjan kóshesinde káriz kollektory jaryldy.
Oral qalasy ákimdigi málim etkenindeı, Saratov tas joly boıyndaǵy káriz kollektorynda da apatty jaǵdaı oryn aldy. Osyǵan baılanysty Zachagan kentinde búgin jergilikti saǵat 11.00-den bastap sý berý ýaqytsha toqtatyldy. Turǵyndarǵa sýdy tasymaldap berý uıymdastyrylýda.
Qazirgi kezde káriz kollektorynda qalpyna keltirý jumystary júrgizilýde.
Zachagan kenti ákiminiń orynbasary Nurbolat Muhıtovtyń aıtýynsha, kent aýmaǵynda 57500 adam turady.
«Kent aýmaǵyndaǵy №6 emhanaǵa, mektepter men balabaqshalarǵa, basqa da áleýmettik mekemelerge sý jınap alý jóninde aldyn ala eskertildi», dedi QazAqparat tilshisine N.Muhıtov.
