Oraldaǵy turmystyq qaldyqtar polıgonynda qoqystyń byqsyp janýy jalǵasýda
ORAL. QazAqparat - Oraldaǵy turmystyq qatty qaldyqtar polıgonynda qoqystyń byqsyp janýy jalǵasýda, dep habarlaıdy QazAqparat tilshisi.
Sońǵy jyldary bul másele qalaǵa qarasty Zachagan kenti turǵyndarynyń bas aýrýyna aınalyp otyr.
Ásirese, túnge qaraı janatyndyqtan, taza aýamen demalý múmkin bolmaı qalady.
Óńirde sońǵy kúnderi jel kúsheıgendikten, qoqystyń byqsyp janýy údeı bastady.
BQO TJ departamentiniń baspasóz qyzmetinen túsken málimetke qaraǵanda, búgin tańǵy saǵat 07.46-da 112 telefonyna qoqystyń byqsyp janyp jatqany jóninde qońyraý shalynǵan.
Oqıǵa ornyna 2 adam 1 tehnıkamen jiberildi.
Keıin, saǵat 08.24-te polıgonǵa taǵy 2 adam (1 tehnıka) attandy.
Sonymen qatar bul jumysqa qosymsha 3 býldozer, 4 júk tıeýshi, 4 ekskavator, 10 sý sorý mashınasy, 10 «KamAZ» kóligi tartyldy.
«Bul másele departament pen Oral qalasy basshylyǵynyń erekshe baqylaýyna alynǵan», dep habarlady departamenttiń baspasóz qyzmetinen.
Alaıda jylda qaıtalanatyn osy kóriniske tosqaýyl qoıylmaı keledi.
Aıta keteıik, atalmysh polıgon fın ınvestorlary qurǵan «ICM Recycling» JShS-ǵa senimdi basqarýǵa berilgen bolatyn.
