Oraldaǵy merekelik sherýge 40 myńnan astam adam qatysty
ORAL. QazAqparat - Búgin Oralda Qazaqstan halqynyń birligi kúnine oraı merekelik sharalar ótti, dep habarlaıdy QazAqparat tilshisi.
Dostyq dańǵylymen Qazaqstan halqy Batys Qazaqstan oblystyq assambleıasy, oblys ákimdigi, basqarma, departamentter, óńirdegi mekeme-kásiporyndar, oqý oryndary meıramǵa tán sán-saltanatpen júrip ótti.
Sherýge 40 myńnan astam adam qatysyp, Qazaq elindegi dostyqtyń tamyry tereńde, bereke-birliktiń jyl sanap nyǵaıyp kele jatqandyǵyn kórsetti.
Abaı alańyna jınalǵan jurtshylyqty oblys ákimi Altaı Kólginov quttyqtap, izgi tilegin jetkizdi.
«Búgin - árbir batysqazaqstandyq úshin, táýelsiz Qazaqstannyń ár azamaty úshin birlik pen yntymaqty, baýyrmaldylyqty tanytatyn jalpyulttyq mereke. Qazaqstan táýelsizdik alǵannan bergi 27 jyl ishinde orasan zor tabystarǵa qol jetkizdi. Elbasymyz Nursultan Ábishuly Nazarbaev elimizdi damytýda aıanbaı eńbek etip, kópultty Qazaqstandy alǵa jetelep keledi. Kúni keshe Assambleıanyń kezekti sessııasyn ótkizgen Elbasymyz yrys pen yntymaqtyń, tabys-jetistikterdiń kilti birlikte ekendigin taǵy bir márte atap ótti. Bıyl Astananyń 20 jyldyǵy keń kólemde toılanady. Prezıdenttiń bes áleýmettik tapsyrmasyna sáıkes josparly jumystar júzege asady. Oblys halqy da memleketimizdiń damýyna óz úlesin qosa beretin bolady», dedi óńir basshysy.
Mereke kontserttik baǵdarlamaǵa, basqa da qyzyqty sharalarǵa ulasty.
