Oraldaǵy mamandandyrylǵan HQO avtodromynda jańa GPS júıesi iske qosyldy
«Azamattarǵa arnalǵan úkimet» memlekettik korporatsııasy Oral qalasyndaǵy mamandandyrylǵan HQO avtodromyn jańartý jumystaryn júrgizdi. Munda praktıkalyq emtıhan tapsyrý úshin GPS júıesi ornatyldy.
«Azamattarǵa arnalǵan úkimet» MK BQO fılıalynyń dırektory Nádir Qurymbaevtyń aıtýynsha, endi praktıkalyq emtıhan barysynda burynǵydaı magnıt datchıkteri paıdalanylmaıdy, barlyq derek spýtnık arqyly jetkiziledi.
Onyń sózine qaraǵanda, buryn avtokólik júrgizý barysyndaǵy erejege sáıkes beriletin baldy esepteıtin qurylǵy eskirip, qaıta-qaıta isten shyǵa beretin. GPS tehnologııasy barlyq aqparattyq qaýipsizdik talaptaryna sáıkes keledi, emtıhan tapsyrýshynyń qaı jerde qateleskeni jáne sebebi sıtýatsııalyq ortalyqqa birden joldanady.
«Buryn datchıkter bamperdiń astyna ornatylǵan bolatyn, eger kólik soǵylsa, ol birden isten shyǵatyn. Endi qajetti jabdyqtar salonnyń ishine qoıyldy. Sondyqtan jeńil soqtyǵys bolsa da, kólik qozǵalysy týraly aqparat esh aqaýsyz alynady», – dedi QazAqparat tilshisine Nádir Qurymbaev.
Jańa júıeniń nátıjesinde mamandandyrylǵan HQO avtodromy kúnine shamamen 30-40 kýrsantty qabyldaıdy dep josparlanýda.
2022 jyly Oral qalasyndaǵy mamandandyrylǵan HQO arqyly 76 myń memlekettik qyzmet kórsetildi. Sonyń ishinde 35 661 kólik tirkelip, 39 669 júrgizýshi kýáligi berildi.
Eske sala keteıik, budan buryn Batys Qazaqstanda qandas mártebesin alýshylar qatary kóbeıgenin jazǵan bolatynbyz.
Sýret: «Azamattarǵa arnalǵan úkimet» MK BQO fılıaly.