Oraldaǵy kelin, Ońtústik Koreıadaǵy kúıeý bala: Qazaqstandyqtar onlaın-toı jasady

Dúısenovtar otbasynda úsh bala bar. Eki ul men Qorlan atty bir qyz bar. Qorlandy búkil qazaqy dástúrmen uzatý josparlanǵan edi. Dýmandy jıyn men toı kóılegin boıjetkenniń ózi de ańsaǵan bolatyn. Toıdyń ótetinin ótken jyly josparlap qoıyp, tipti toıhanamen de kelisilgen. Artynsha toı shildege shegerilipti. Aqyry eldegi ahýalǵa baılanysty toı ótpeı qalǵan.

«Kóılekti astanadan aldyrdym. Bári daıyn edi. Alaıda pandemııaǵa baılanysty toıdy ótkizbeý týraly sheshim qabyldandy», - deıdi Qorlan Dúısenova.

Toı 17 shildede ótýi tıis edi. Meıramhanaǵa aldyn ala tólem júrgizilip qoıǵan. Qonaqtar da aldyn ala shaqyrylǵan. Shamamen 180-200 adamnyń keletini josparlanǵan. Áıtse de toı eń jaqyn týǵan-týystyń qatysýymen ótkizilip otyr.

Pandemııa búkil jospardy buzǵanymen toı ótkizýge kedergi keltire almapty. Kókshetaý, Nur-Sultan, Almaty, Ońtústik Koreıa – el ishi men sheteldegi qonaqtyń barlyǵy zoom-platformasy arqyly jastardy quttyqtady.

«Kúıeý balamen ınternet arqyly tanysqanbyz. Toı baǵdarlamasyn bárine WhatsApp arqyly joldadyq. Asaba onlaın-toıdy tuńǵysh ret ótkizse de birden alyp ketti. Bári keremet boldy», - deıdi Qorlannyń anasy Nurgúl Qazımova.

Qorlannyń ata-anasy bári de qazaqy jolmen ótýi kerektigin qalapty.

«Quda túsý, syrǵa salý... Іzinshe bárimiz de ortaq oıǵa kelgen jón dep sheshtik. Onlaın toıǵa bári kelisti. Áý basta onlaın-toı týraly ázildese áńgime aıtatyn edik. Biraq keıin shynynda da ony ótkizýge bolatynyn bildik. Syrǵany aldyn ala joldady. Jeńgelerim dástúrge saı bólmeme kirip, syrǵamdy taǵyp berdi», - deıdi Qorlan Dúısenova.

Nurgúl Qazımova qudalar tarapynan da qarsylyq bolmaǵanyn aıtady.

«Basynda táýekelge baryp qaıtemiz dep oılaǵan edik. Qudalarymyz Kókshetaýdan kelýi kerek edi. Poıyzben kóp adamnyń keletini josparlanǵan. Onlaın ótkizý týraly usynysqa olar da kelise ketti», - deıdi ol.

Kúıeý bala Kókshetaýdan eken. Ákesi qudalaryn birinshi ret onlaın kórip otyr. Salt boıynsha jastardyń úı bolý týraly talap-tilegin oryndaýdy suraıdy. Jastar Nazarbaev Ýnıversıtetinde tanysypty. Ondaǵy oqýdy aıaqtaǵannan keıin álemniń eki elinde oqýlaryn jalǵastyrypty. Qorlan Amerıkada bolsa, joldasy Ońtústik Koreıada.

Qorlannyń aıtýynsha kúıeýiniń elge kelýge múmkindigi bolǵan. Biraq Ońtústik Koreıadan shyqqanǵa deıin, shyqqannan keıin eki ret PTR-test tapsyryp, 14 kúndik karantınge jatqyzylatyndyqtan ýaqyt ótip ketedi.

«Áýejaılar qaýipti bolyp tur. Sol sebepti táýekelge barmaǵan jón dep sheshtik», - dedi Qorlan.

Bir aıdan keıin Qorlan Ońtústik Koreıaǵa barady. Ol hımııa ǵylymdarynyń doktory dárejesin alýdy kózdeıdi eken. Sondaǵy elshilikte jastar nekeni tirkeýdi josparlap otyr. Al qudalasqan qudalar eldegi epıdemıologııalyq ahýal jaqsarǵannan keıin kórispek.