Oraldaǵy qarttar úıinde bólmelesin óltirgen turǵyn on jylǵa sottaldy
ORAL. QazAqparat - Oraldaǵy qarttar úıinde bólmelesin óltirgen turǵyn on jylǵa sottaldy, dep habarlaıdy QazAqparat tilshisi.
BQO qylmystyq ister jónindegi mamandandyrylǵan aýdanaralyq sotynyń 19 qazandaǵy úkimimen Hamıt Qojbanov QR QK 99-baby 1-bóligine sáıkes aıypty dep tanylyp, oǵan 10 jylǵa bas bostandyǵynan aıyrý jazasyn qaýipsizdigi joǵary qylmystyq-atqarý júıesi mekemesinde óteý belgilendi.
Atalmysh sottan túsken málimetke qaraǵanda, H.Qojbanov 31 shilde kúni saǵat shamamen 11.30-da «Oral arnaıy áleýmettik qyzmet kórsetý ortalyǵy» mekemesiniń №413 bólmesinde ózimen birge turatyn J.Óteǵalıevpen araq ishken.
Shamamen saǵat 13.30-da ekeýi sózge kelip, sonyń saldarynan J.Óteǵalıev ústelden asúı pyshaǵyn alyp, H.Qojbanovqa siltep, qolyn jaraqattaǵan. H.Qojbanov onyń qolynan pyshaqty tartyp alyp, laqtyryp tastap, mekeme qyzmetkerlerin shaqyrýdyń ornyna óltirý maqsatymen J.Óteǵalıevtiń júrek tusyna suqqan. Sonyń saldarynan marqum oqıǵa ornynda kóz jumdy.
Úkim zańdy kúshine engen joq.
Eske sala keteıik, budan buryn Oraldaǵy qarttar úıiniń bir turǵyny ekinshisin pyshaqtap óltirgenin jazǵan bolatynbyz.
