Oraldaǵy ınvestforýmda QR men RF shekara óńirleriniń kórmesi ótedi
ASTANA. QazAqparat - Oralda 27-28 qyrkúıek aralyǵynda WestKazInvest-2017 IV Halyqaralyq ınvestıtsııalyq forýmy ótedi, dep habarlady forýmnyń baspasóz qyzmeti.
«Forýmnyń basty maqsaty bıznesmender men is-shara qonaqtaryn Batys Qazaqstan oblysynyń naqty ınvestıtsııalyq jobalarymen jáne ınvestıtsııalyq áleýetimen, ekonomıkalyq jetistikterimen tanystyrý bolyp tabylady. Atalmysh alań Batys Qazaqstan oblysynyń kompanııalarymen men sheteldik kompanııalar arasyndaǵy ózara tıimdi seriktestikti qurý úshin uıymdastyryldy», - delingen habarlamada.
«WestKazInvest-2017» forýmnyń qatysýshylaryna birlesken kásiporyndar qurý jáne óz múmkindikterin usyný úshin jergilikti kompanııalardy tabýǵa jáne tanystyrýǵa múmkindik beredi. Forým aıasynda «Qazaqstan-Reseı. Óńirlerdiń shekaralyq yntymaqtastyǵy» kórmesi ótedi. Onyń úsh paneldik sessııasynyń mańyzdy taqyryptary mynadaı: «Munaı-gaz sektory - ónerkásipti damytý draıveri», «Agroónerkásiptik keshen: damý. Qaıta óńdeý. Eksporttaý» jáne «Halyqaralyq qarjy uıymdary men bıznesti damytý ınstıtýttaryna qoldaý kórsetý quraldary».
Sondaı-aq, forýmnyń alańynda Batys Qazaqstan jáne Orynbor oblystarynyń isker áıelderiniń kezdesýi jáne Oral qalasyndaǵy saýda jelileriniń ókilderimen aýyl sharýashylyǵy óndirýshileriniń jáne óńdeýshilerdiń iskerlik kezdesýi ótedi.
Forým alańdarynda densaýlyq saqtaý máseleleri, ıntegratsııalanǵan menedjment júıesi jáne olardy Biryńǵaı Eýrazııalyq ekonomıkalyq aımaqta qoldaný boıynsha dóńgelek ústelder uıymdastyrylady.
