Oraldaǵy drama teatrǵa jas mamandar kóp tartylmaq
ORAL. QazAqparat - H.Bókeeva atyndaǵy BQO qazaq drama teatry jas akterlarmen tolyǵa túspek. Bul týraly Halyqaralyq teatr kúnine arnalǵan merekelik sharada aıtyldy, dep habarlaıdy QazAqparat tilshisi.
Oblystyq mádenıet basqarmasynyń basshysy Qadyrbolat Musaǵalıevtiń aıtýynsha, Hadısha Bókeeva atyndaǵy qazaq teatry óz sheberlik deńgeıin jyl sanap jetildirip keledi.
Ótken jylǵy jeltoqsanda 25 jyldyǵyn keń kólemde atap ótken kıeli qara shańyraqta jyl saıyn segiz-toǵyz jańa qoıylym sahnalanady. Bıylǵy maýsymnyń ózinde bes spektakldiń premerasy boldy.
Teatrdyń erteńi myqty bolýy úshin onyń quramyn talantty jastarmen tolyqtyryp otyrǵan lázim.
«Qazirgi kezde akterlik mamandyqqa oqyp jatqan jastar az emes. Osyǵan oraı teatr usynysyna sáıkes bıyldan bastap Oraldaǵy jastar shyǵarmashylyǵy ortalyǵynda qosymsha otyz shtat ashylady. Onda óziniń ónerin teatr salasyna arnaǵysy keletin jas mamandar qabyldanyp, óz qabilet-qarymyn damytatyn bolady. Sodan keıin olar teatrǵa keledi», dedi Qadyrbolat Qabdyruly.
Teatr ujymyn merekemen belgili aıtysker aqyn, til janashyry, Qazaqstannyń eńbek sińirgen mádenıet qyzmetkeri Sholpan Qydyrnııazova quttyqtady.
«Ózińdi kórý úshin, ónege terý úshin, jamandyqtan jırenip, adamdyqqa erý úshin, jalpy, ultyńdy taný úshin, lapyldap janý úshin, ult bolyp qalý úshin teatrǵa kelý kerek. Teatrdy súıý kerek. Teatrdyń jankeshti akterlarymen birge qýanyshqa shattanyp, qaıǵyǵa kúıý kerek. Sonda ǵana biz qazaq degen tolyqqandy ult bolyp qalamyz», - dedi Sholpan Batyrqyzy.
Teatr meıramyna oraı sala úzdikteri alǵyshattarmen, túrli atalymdarmen marapattaldy.
Jıynda aıtylǵanyndaı, Halyqaralyq teatr kúni 1961 jyldan beri atalyp kele jatqanymen, onyń tamyry tereńde. Eń kóne qoıylym osydan eki jarym myń jyl buryn Afınyda qoıylǵany jóninde tarıhı derekter bar.
Eske sala keteıik, budan buryn BQO teatrynyń jańa qoıylymyn Farıza aqynǵa arnaǵanyn jazǵan bolatynbyz.
