Oraldaǵy birqatar bazarda sanıtarlyq talaptar saqtalmaǵan
ORAL. QazAqparat – Oral qalasyndaǵy birqatar bazarlarda sanıtarlyq talaptar saqtalmaı otyr. Bul týraly arnaıy monıtorıngtik top músheleri júrgizgen reıd kezinde belgili boldy, dep habarlaıdy QazAqparat tilshisi.
«Altyn alma» jáne temirjol vokzaly aýdanyndaǵy «Mıhaıl» azyq-túlik bazarlaryn teksergen kezde ekeýine ortaq kemshilikterdiń beti ashyldy.
Atap aıtqanda, satýshylar betperde ne qolǵap kımese, sonymen qatar satyp alýshylar tarapynan araqashyqtyqty saqtamaý baıqaldy.
Oral qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasy basshysynyń orynbasary Roza Hasenovanyń málim etkenindeı, monıtorıngtik top kún saıyn karantın jaǵdaıynda azyq-túlik bazarlarynda sanıtarlyq talaptardyń saqtalýyn qadaǵalaıdy. Bári de arnaıy jasalǵan algorıtmge saı bolýy tıis. Búgin kóptegen satýshylar eskertýmen qutyldy. Araqashyqtyqty saqtaý óz aldyna, satýshylar men klıentter betperdeni durys kımeıdi.
Bas memlekettik sanıtar dárigeriniń qaýlysy múltiksiz saqtalýy kerek. Mysaly, kókónis pen jemis-jıdekten basqa sórede turǵan azyq-túlikterdiń barlyǵy oramada turýy tıis.
«Bazarlarda tártiptiń saqtalýyn baqylaıtyn jaýapty adam bolýy kerek. Bazar ákimshisi nemese kúzet qyzmeti satyp alýshylar arasynda áleýmettik araqashyqtyqtyń saqtalýyn, saýda ornynyń sanıtarlyq óńdeýden ótkizilýin, sondaı-aq satýshylar men kelýshilerde jeke qorǵanysh quraldarynyń bolýyn qadaǵalaýy qajet», - dedi R.Hasenova.
«Altyn alma» bazaryndaǵy ashanada da ústelderdiń araqashyqtyǵy saqtalmaǵany, birqatar qyzmetkerlerde betperde men qolǵaptyń joqtyǵy anyqtaldy.
Reıd qorytyndysynda «Altyn alma» bazarynyń ákimshiligine eskertý jasalǵanyn aıtqan Oral qalasy kásipkerlik jáne aýyl sharýashylyǵy bóliminiń sektor meńgerýshisi Altynbek Nursultanov aldaǵy ýaqytta mundaı tekseristerdiń jalǵasatynyn jetkizdi.
«Erteńnen bastap basqarmaǵa túsken ótinishterge sáıkes bazarlarda tekserýler júrgiziledi. Tekserý qorytyndysyna sáıkes tıisti sheshimder qabyldanatyn bolady», dedi QazAqparat tilshisine Oral qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasynyń basshysy Mádenıet Tanaýov.
Eske sala keteıik, budan buryn BQO-da koronavırýstan kóz jumǵan 79 jastaǵy keıýananyń aýrýy asqynǵansha dárigerge qaralmaǵanyn jazǵan bolatynbyz.
