Oraldaǵy «Balalar úıi» dúkeniniń kúzetshisin óltirgen kúdiktiler quryqtaldy

Bul týraly búgin Astanada ótken aptalyq brıfıngte Іshki ister mınıstrliginiń resmı ókili Nurdildá Oraz málim etti.

«Batys Qazaqstan oblysynyń polıtsııa qyzmetkerleri Oral qalasyndaǵy dúkenderdiń birinde 50 jastaǵy kúzetshini paıdakúnemdik maqsatta óltirý qylmysyn ashty. Aǵymdaǵy jylǵy 1 sáýirde dene jaraqattary keltirilgen jáne tunshyqtyrylyp óltirilgen kúzetshiniń máıiti «Balalar úıi» dúkeninde tabyldy. Oqıǵa bolǵan jerden dúkenge arnalǵan qujattar, altyn buıymdar men dúken ıesine tıesili - 3 mıllıon teńgege aqsha salynǵan temir seıf urlanyp ketken»,-dedi resmı ókil.

 Jedel-izdestirý is-sharalar keshenin ótkizý kezinde 23 jáne 35 jastaǵy eki jergilikti turǵyn qolǵa tústi. Tergeý barysynda ustalǵan 23 jastaǵy jas jigit osy dúkende jıhaz jınaqtaýshysy bolyp jumys istegeni, al ekinshisi onyń ápkesimen birge turatyny anyqtaldy.

«Sol kúni ol jumystan kelip, dúkende eńbekaqy berip jatqany jáne seıfte iri aqsha saqtalyp jatqany týraly habarlaǵan. Túngi ýaqytta ekeýi dúkenge kelip, onda qalǵan zattardy alý úshin kúzetshiden esikti ashýdy ótingen. Kúzetshi esh kúdiksiz esikti ashyp, ekeýin ishke kirgizgen. Sodan keıin kúzetshini dúkenniń jertólesinde óltirip,  dúken dırektorynyń kabınetine kirip, seıfti urlap ketken»,-dedi N. Oraz.

Ustalǵandardyń biriniń úıine tintý júrgizý barysynda jasyryn jerde saqtalǵan 20 altyn buıym tabylyp, tárkilendi. Sonymen birge ápkesiniń úıinen de altyn buıymdar tabyldy.Ustalǵandar ýaqytsha ustaý ızolıatoryna qamaýǵa alyndy. Qazirgi ýaqytta dáleldeý bazasyn qalyptastyrýǵa baǵyttalǵan jedel-tergeý is-sharalary júrgizilýde jáne olardyń basqa qylmystarǵa qatystylyǵy tekserilýde.