Oraldaǵy «Aqjaıyq» shaǵynaýdanynda kópqabatty úıler boı kótermek
ORAL. QazAqparat – Oraldaǵy «Aqjaıyq» shaǵynaýdanynda kópqabatty úıler boı kótermek, dep habarlaıdy QazAqparat tilshisi.
Oblystyq qurylys basqarmasynyń basshysy Álibek Antazıevtiń aıtýynsha, joba júzege asqan kezde 25 myńnan astam páterde 84 myń adam turatyn bolady.
Qurylysty jańa shaǵynaýdannyń ortalyq jáne ońtústiginen bastaý josparlanýda.
Salynǵan turǵyn úıler «Turǵyn úı qurylys jınaq banki» AQ júıesi arqyly ár sharshy metri úshin 140-150 myń teńgeden satylatyn bolady.
Osy baǵytta BQO ákimdigi men atalǵan bank arasynda arnaıy memorandým jasaldy. Bank jylyna memlekettik baǵdarlamalar aıasynda 36 myń sharshy metr, jeke qurylys fırmalarynan 120 myń sharshy metr páter satyp alýdy kózdep otyr.
«Bastapqy kezeńde qurylys salasynda tájirıbesi mol iri kompanııalardy jumysqa tarta otyryp, muǵalimder men dárigerlerge, polıtsııa qyzmetkerlerine arnalǵan turǵyn úıler salynatyn bolady. Páterlerdi nesıeleý kezinde jergilikti atqarýshy organdar bastapqy jarnanyń 50 paıyzyn óteýge 1 mln teńgeden aspaıtyn sertıfıkattar beredi. Turǵyn úı sondaı-aq «7-20-25», «5-10-20» jáne ekinshi deńgeıdegi bankterdiń túrli baǵdarlamalary arqyly da ótkiziledi», dedi Á.Antazıev.
Kúni búgin «Aqjaıyq» shaǵynaýdanynda bıýdjet esebinen negizgi ınjenerlik ınfraqurylymdar tartý jumysy tolyqtaı márege jetken. Kópqabatty úıler salatyn qurylys kompanııalaryna qoldaý kórsetilip, jer telimi resimdelip, ınjenerlik jeliler jetkiziledi. Sonymen qatar jańa shaǵynaýdanda mektep, balabaqsha, emhana, stadıon sekildi áleýmettik sala nysandary da boı kóteretin bolady.
Eske sala keteıik, budan buryn Oralda qurylysy bitpeı, qańyrap turǵan nysandardyń az emestigin jazǵan bolatynbyz.
