Oraldaǵy «jańa tehnologııa»: Jańbyr jaýsa, kópqabatty úıdiń aýlasy kól bolady
ORAL. KAZINFORM – Oral qalasynda jańadan salynyp jatqan «Aqjaıyq» shaǵynaýdanynda kópqabatty úıdiń aýlasynda jańbyr sýy jınalyp tur.
Qala turǵyny Muhtar Ótesovtiń Instagram áleýmettik jelisinde málim etkenindeı, № 17 úıdiń aýlasynda jańbyr jaýsa, sý eshqaıda aqpaıdy.
- Mine, «jańa tehnologııa»! Sýdyń rahatyn úsh sıyr ǵana kórip tur. Asfalttan «astaý» jasap qoıǵan merdigerge erekshe nazar aýdarý kerek, - deıdi M.Ótesov.
Kazinform tilshisiniń saýalyna oraı bul jaıtty Oral qalasy ákimdigi túsindirip berdi.
Ákimdikten alynǵan málimetke qaraǵanda, atalǵan aýmaqta úıdiń aldyndaǵy jol boıynda tóselgen qara topyraqtyń deńgeıi asfalttan joǵary ornalasqan. Sonyń saldarynan jaýyn nemese erigen qar sýy aǵar jol tappaı, jınalyp qalady.
- Qazirgi ýaqytta bul máseleni sheshý maqsatynda eki jaǵynan sý aǵar júıelerin ornatý josparlanyp otyr. Qara topyraqtyń deńgeıi tómendetilip, sýdyń erkin aǵýyn qamtamasyz etý jumystary jasalady. Aıta ketý kerek, bul nysandy ázirge tapsyrys berýshi — Oral qalasynyń qurylys bólimi qabyldaǵan joq. Qurylys jumystary áli jalǵasyp jatyr, sondyqtan atalǵan eskertýler men túzetýler jobany tolyq aıaqtaý barysynda eskeriletin bolady, - delingen resmı jaýapta.
Oralda sońǵy kúnderi jańbyr jıilep tur.
Eske sala keteıik, budan buryn Oralda «Aqjaıyq» shaǵynaýdany qalaı salynyp jatqanyn jazǵan edik.