Oraldaǵy saıajaılarda qalyp qoıǵan turǵyndardyń bar-joǵyn tekserý jalǵasyp jatyr

ASTANA. KAZINFORM — Elimizde sý tasqynyna qarsy jumystarǵa 32 myńnan astam adam jumyldyryldy. Bul týraly Tótenshe jaǵdaılar mınıstrliginiń ókili Asqar Shárip aıtty.

«Azamattyq qorǵaý qyzmetteri, volonterler jáne tartylǵan uıymdar Atyraý, Aqtóbe, Batys Qazaqstan jáne Soltústik Qazaqstan oblystarynda sý tasqynymen kúresti jáne halyqqa kómektesý jumystaryn jalǵastyryp jatyr. Batys Qazaqstan oblysyndaǵy Oral qalasynda Jaıyq ózeniniń sý deńgeıine monıtorıng jasalyp otyr. Qazir úılerdi sý basýdyń jańa oqıǵalary tirkelgen joq. Saıajaıda qalyp qoıǵan turǵyndardyń bar-joǵyn tekserý úshin aýmaqty aralaý jumystary iske asyrylyp jatyr», - dedi A. Shárip Ortalyq kommýnıkatsııalar qyzmetindegi brıfıngide.

Onyń aıtýynsha, dál qazir elimiz boıynsha 25 324 adam óz úılerine oraldy. 8 783 adam, onyń ishinde 3 832 bala evakýatsııalaý pýnktterinde ornalasqan.

«4 708 turǵyn úı men 2 774 aýla aýmaǵynan sýdyń baǵyty burylyp, qurǵatyldy. Jedel jeli telefonyna 2 173 ret qońyraý shalyndy. Avarııalyq-qutqarý jáne sý tasqynyna qarsy jumystarǵa 32 myńnan astam adam, 5 myńǵa jýyq tehnıka, 806 sý sorý quraly, 310 júzý quraly, 13 áýe kóligi jumyldyryldy», - dedi vedomstvo ókili.

Eske sala keteıik, Jaıyq ózenindegi sý deńgeıi Oral qalasy tusynda 864 santımetrdi kórsetti. 

Oral qalasynda 116 saıajaı birlestigin sý basty. 

BQO-da sý tasqynynan zardap shekken turǵyndardan 5 500 ótinish qabyldandy.