Oraldaǵy saıabaqta Qyzyl kitapqa engizilgen emender qýrap jatyr
ORAL. KAZINFORM — Oral qalasyna qarasty Derkól kentindegi saıabaqtyń jaı-kúıi syn kótermeıtini týraly áleýmettik jelide beınejazba jarııalandy.
«Batys Qazaqstan ekologııalyq geografııalyq qoǵamy» qoǵamdyq birlestiginiń tóraǵasy Darhan Sarıevtiń málim etkenindeı, saıabaqta kútimsiz qalǵan terekter qýrap jatyr. Aramshóptiń basqandyǵy sondaı, adam boıynan asyp ketken.
— Ekolog Dáýrenbek Sahym ekeýmiz saıabaqty qarap shyqtyq. Parktiń basym bóligine emender otyrǵyzylǵanyna 70-80 jyl bolǵan. Kútimsizdikten qýrap, ólip jatyr. Al emen shyn máninde Qazaqstannyń Qyzyl kitabyna engizilgen. Mádenıet jáne demalys saıabaqtary men skverleri dırektsııasy bul jumysty nege retke keltirmeıdi? Saıabaqty tazartyp, baǵaly aǵashtardy saqtap qalýdyń shuǵyl sharasyn alý kerek, — deıdi D. Sarıev.
Osyǵan oraı Kazinform tilshisi Oral qalasy ákimdigine arnaıy saýal joldaǵan edi.
Ákimdikten túsken málimetke qaraǵanda, Derkól saıabaǵynyń jalpy aýmaǵy — shamamen 6 gektar.
Saıabaqtaǵy aǵashtardyń basym bóligi Keńes dáýirinde otyrǵyzylǵan. Búginde olardyń bir bóligi tabıǵı qartaıý kezeńine jetken. Soǵan baılanysty butaqtary qýrap, dińderi álsiregen Oǵan qosa tamyr júıesiniń zaqymdanýy jáne aǵashtardyń ornyqtylyǵynyń tómendeýi sııaqty belgiler baıqalady.
— Saıabaq aýmaǵynyń úlkendigine jáne júrgizilýi qajet jumystardyń kólemine baılanysty barlyq jumysty bir ýaqytta tolyq oryndaý múmkin emes. Osyǵan baılanysty jasyl jelekterdi kútip ustaý jáne jańartý jumystaryn bólingen qarjy kólemine sáıkes kezeń-kezeńimen júrgizý josparlanyp otyr. Sonymen qatar saıabaq aýmaǵyn abattandyrý jáne sanıtarlyq tazalyqty saqtaý jumystary turaqty túrde júrgiziledi. Atap aıtqanda, «Jaıyq taza qala» JShS qyzmetkerleri saıabaqty qoqystan tazalap, aýmaqty tıisti sanıtarlyq jaǵdaıda ustaý jumystaryn atqarýda, — delingen resmı jaýapta.
Eske sala keteıik, budan buryn Oralda otalǵan aǵashtardyń ornyna ótemdik kóshetter otyrǵyzý nátıjesi nege kóńil kónshitpeıtinin jazǵan edik.
