Oraldaǵy ortalyq parkte kommertsııalyq nysandar kóbeıtilmeıdi
ORAL. KAZINFORM — Oralda 185 jyldyq tarıhy bar qalalyq mádenıet jáne demalys saıabaǵynda attraktsıondar men saýda alańdarynyń kóptigi jóninde turǵyndar men ekologtar alańdaýshylyq bildirgen edi.
Osy máselege oraı Oral qalasynyń ákimi Murat Baımenovtiń málim etkenindeı, ortalyq parktegi kommertsııalyq nysandar kelisimsharttarǵa sáıkes jumys istep jatyr.
— Budan bylaı mundaı nysandar sany kóbeıtilmeıdi, oǵan moratorıı qoıyldy. Onyń ornyna saıabaq basshylyǵyna kepken butalardy kesip, jasyl jelekti kóbeıtý mindeti júkteldi. Qazirgi kezde Shaǵan ózeninde eki keme júrip tur. Jalpy, aldaǵy ýaqytta adamdar jaqsy demalatyndaı osyndaı parkterdi keńeıtý kózdelip otyr. Óıtkeni qala halqynyń sany 370 myńnan asty. Kúni búgin birneshe skver jańartylýda, shaharda qýraǵan aǵashtardyń ornyna talshyn, bórtegúl, sheten sııaqty ádemi tal-terekter otyrǵyzylyp jatyr. Basty maqsatymyz — oblys ortalyǵyn jasyl jelekke aınaldyrý, — dedi M.Baımenov.
Aıta keteıik, budan buryn ekologtyń ár qalada kólemi 30 gektar bir park salynsa, artyq etpeıtini jóninde aıtqanyn jazǵan bolatynbyz.
Sondaı-aq Qazaqstanda attraktsıondardy tekseretin synaq ortalyqtary bar ma degen saýalǵa jaýap izdep kórdik.