Oraldaǵy Mánshúk Mámetova mýzeıi jańa jádigerlermen tolyqtyryldy
ORAL. KAZINFORM — Oral qalasynda ornalasqan Keńes Odaǵynyń Batyry Mánshúk Mámetovanyń memorıaldyq mýzeıinde qazirgi tańda 10 856 eksponat bar.
Mýzeı meńgerýshisi, ólketanýshy Ahmedııar Batyrhanovtyń málim etkenindeı, 1982 jyly 7 shildede ashylǵan kezde nebári 300 jádiger bolǵan edi.
Ahmedııar Qýanulynyń aıtýyna qaraǵanda, mýzeı qory jańa eksponattarmen tolyqtyrylyp keledi.
— Bıyl Reseıdiń Pskov oblysy Nevel qalasynda oblys delegatsııasy quramynda bolǵan kezde Mánshúk Mámetova erlikpen qaza tapqan Zaıvane derevnıasyna bardyq. Nevelden 27 shaqyrymda eken. Mine, sol jerden «Maksım» pýlemetiniń oǵy salynatyn jáshik, transheıadan tikendi sym jáne topyraq alyp qaıttyq, — deıdi mýzeı meńgerýshisi.
Osy jádigerlerdi bergen «Gvozdıka» izdeý toby jetekshisiniń orynbasary Ivan Malahovtyń aıtýynsha, 1943 jyly 15 qazandaǵy sońǵy shaıqasynda Mánshúk Mámetova transheıa ishinde júgirip júrip, jaýǵa birneshe pýlemetten oqty qarsha jaýdyrǵan. Batyr qyz erlikpen qaza tapqan jerdegi tikendi sym osy kúnge deıin saqtalǵan eken.
Nevelden, sondaı-aq Batys Qazaqstan oblysynda Stalıngrad maıdanynyń jaqyn tyly bolyp, soǵys jaǵdaıynda dep jarııalanǵan eki aýdannyń biri — Jánibekten jetkizilgen basqa da buıymdar men zattar barshylyq.
Ahmedııar Batyrhanovtyń málimdeýinshe, jádigerlerdiń bárin bir mezgilde kórmege qoıý múmkin emes. Olardyń kópshiligi qorda saqtalady. Maıdangerlerdiń mereıtoılyq is-sharalaryna baılanysty dóńgelek ústel, urpaqtarymen kezdesýler ótkizilgen kezde jádigerler jyljymaly kórmege qoıylady. Buryn mýzeı janyndaǵy «Maıdanger» («Frontovıchka») klýbynda 69 ardager áıel bolǵan. Klýbtyń sońǵy múshesi Alevtına Mıtrohına ótken jyly dúnıeden ozdy.
— Maıdangerlerdiń jaqyn týystary jádigerlerdi tapsyryp jatady. Mysaly, Ekinshi dúnıejúzilik soǵysta áskerı dáriger bolǵan Hamza Zınýllınniń inisi Jasulan aǵasynyń shınelin, sherýde kıetin kıimin, úsh ordeni men medaldaryn tabys etti. Bulardyń bári de keıingi urpaq úshin qundy, — dedi Ahmedııar Batyrhanov.
Qazirgi kezde Mánshúk murajaıynda G.Potanın atyndaǵy Pavlodar oblystyq tarıhı-ólketaný mýzeıinen jarty jylǵa ákelingen, batyr qyz paıdalanǵan samaýryn kórmede tur. Jádiger Mánshúktiń anasy Ámına Mámetova tapsyrǵan samaýrynnyń janyna qoıylǵan.
BQO tarıhı-ólketaný mýzeıi dırektorynyń orynbasary Ajar Berikqalıqyzynyń baıandaýynsha, batysqazaqstandyqtar Pavlodar qalasyna jyljymaly kórmemen barǵan eken.
— Pavlodar oblystyq tarıhı-ólketaný mýzeıi qyzmetkerleriniń sózinen bilgenimizdeı, 2014 jyly Reseıdiń Pskov oblysy Nevel qalasyna Pavlodar qalasynan arnaıy ekspedıtsııa uıymdastyrylǵan. Sırek jádiger — Ekinshi dúnıejúzilik soǵys kezindegi samaýryn Nevel qalasynda saqtalǵan. Samaýryn dańqty 100-ulttyq atqyshtar brıgadasynyń ıeliginde bolǵan. Onymen qarýlastarymen birge batyr apamyz shaı ishken. Ekspedıtsııa quramynda bolǵan «Maıdan joly» izdestirý jasaǵynyń múshesi Jumabek Qamzın birneshe jádigermen birge samaýryndy alyp kelip, Pavlodar mýzeıine tapsyrǵan. Endi bul jádigerdi Mánshúk Mámetova mýzeıine kelgender alty aıdaı tamashalaıtyn bolady, — deıdi Ajar Berikqalıqyzy.
Eske sala keteıik, budan buryn Mánshúk Mámetovaǵa alǵashqy eskertkish qalaı ornatylǵanyn jazǵan edik.