Oraldaǵy qar synamalaryna júrgizilgen hımııalyq taldaý nátıjeleri jarııalandy

ORAL. KAZINFORM – BQO boıynsha ekologııa departamenti zerthanalyq-taldamaly baqylaý bóliminiń mamandary qala turǵynynyń ótinishine sáıkes Teleortalyq aýmaǵynan qar synamalaryn aldy.

Departamentten túsken málimetke qaraǵanda, qar synamalaryna hımııalyq taldaý júrgizilip, onyń nátıjeleri belgili boldy.

Taldaý qorytyndylaryna sáıkes qalqymaly ólshemeli zattar men hlorıdter mólsheri – 1,6 ese, sýlfattar – 2,2, munaı ónimderi 2,4 esege shamadan tys asyp ketkeni anyqtaldy.

– Bul qala kósheleri men onyń mańyndaǵy aýmaqtardan shyǵarylǵan qarda paıda bolǵan lastaýshy zattardyń jınalýynan týyndaýy múmkin. Qalqymaly ólshemeli zattar men munaı ónimderiniń joǵary mólsheri avtokóliktiń áserine baılanysty. Al hlorıdter men sýlfattardyń shamadan tys asyp ketýi qar men muzǵa qarsy reagentterdiń qoldanylýynan bolýy yqtımal, - delingen resmı málimette. 

Eske sala keteıik, budan buryn Oralda turǵyndar qardyń sý qorǵaý aýmaǵyna tógilip jatqany týraly dabyl qaqqanyn jazǵan edik.

Sondaı-aq qardyń sý qorǵaý aýmaǵyna shyǵarylýyna baılanysty ákimdikke aıyppul salyndy. Osy máselege oraı Oral qalasy ákimdigi Shaǵan ózenindegi atalǵan sý qorǵaý aýmaǵyna tek taza qardyń shyǵarylatynyn alǵa tartqan bolatyn.