Oraldaǵy kafede taraqan júr: jeke kásipkerge ákimshilik is qozǵaldy
ORAL. KAZINFORM — Oral qalasyndaǵy «Shashlykoff» kafesinde taraqan júrgeni jóninde áleýmettik jelide beınejazba jarııalandy.
Qoǵam belsendisi Almagúl Iqsanovanyń málim etkenindeı, taraqan anyq kórinip tur.
— Men beınedáleldi keltirdim. Sanıtarlyq talap buzylǵan. Alaıda tekserý belgili bir ýaqyt ótkennen keıin júrgizilgen, bul merzimde nysandy daıyndap qoıýy múmkin edi. Sanıtarııalyq-epıdemıologııalyq basqarma naqty dáleldi eskermeı, azamattardyń aryz-shaǵymyn obektıvti qaraý jónindegi zańnama talaptaryn buzdy dep esepteımin, — dedi A.Iqsanova.
Osyǵan baılanysty Kazinform tilshisi BQO sanıtarııalyq-epıdemıologııalyq baqylaý departamentine arnaıy saýal joldady.
Departamentten túsken málimetke qaraǵanda, A.Iqsanovanyń shaǵymy qaralǵan.
— Atalmysh materıaldar negizinde «Shashlykoff» grıl-baryna qatysty jeke kásipkerge QR Ákimshilik quqyq buzýshylyq týraly kodeksiniń 425-baby 1-bóligine (halyqtyń sanıtarııalyq-epıdemıologııalyq salamattylyǵy salasyndaǵy zańnama talaptaryn, sondaı-aq gıgıenalyq normatıvterdi buzý) sáıkes ákimshilik is qozǵaldy. Oral qalasy sanıtarııalyq-epıdemıologııalyq baqylaý basqarmasy barlyq shaǵymdardy óz quzyreti aıasynda jáne qoldanystaǵy zańnama aıasynda qaraýdy qamtamasyz etedi, — delingen resmı jaýapta.
Atalǵan bap boıynsha zańbuzýshylyq anyqtalsa, jeke tulǵalarǵa — 20, laýazymdy adamdarǵa, shaǵyn kásipkerlik sýbektilerine nemese kommertsııalyq emes uıymdarǵa — 160, orta kásipkerlik sýbektilerine — 210, iri kásipkerlik sýbektilerine 1 600 AEK mólsherinde aıyppul salynady.
Eske sala keteıik, budan buryn Oral qalasynda 70 adamnan salmonellez anyqtalǵanyn jazǵan bolatynbyz.