Oralda «Jyr dúldúli - Marabaı» baıqaýynyń jeńimpazdary anyqtaldy
ORAL. QazAqparat - Búgin Oralda Marabaı Quljabaıuly atyndaǵy «Jyr dúldúli - Marabaı» respýblıkalyq jyrshylar baıqaýy márege jetip, jeńimpaz-júldegerler marapattaldy, dep habarlaıdy «QazAqparat» tilshisi.
BQO mádenıet, muraǵattar jáne qujattama basqarmasynyń qoldaýymen oblystyq halyq shyǵarmashylyǵy ortalyǵy uıymdastyrǵan baıqaýǵa Atyraý, Aqtóbe, Mańǵystaý, Qyzylorda oblystary men Oral qalasynan jáne Aqjaıyq, Bórli aýdandarynan barlyǵy 10 úmitker qatysyp, baq synady.
Batys Qazaqstanda ómir súrip, jyraýlyq ónerimen daralanǵan Marabaı Quljabaıulynyń esimin máńgi este saqtaý, elimizdiń batys óńirinde kenjelep qalǵan jyraýlar mektebin damytý maqsatynda ótken saıysqa qatysýshylar «Qobylandy batyr» jáne basqa jyrlardy oryndady.
Eki kúnge sozylǵan baıqaý qorytyndysynda belgili ánshi-termeshi, QR eńbek sińirgen qaıratkeri Qatımolla Berdiǵalıev bastaǵan qazylar alqasynyń sheshimimen mańǵystaýlyq Berdibaı Toıǵulıev bas júldege ıe boldy. Qyzylordalyq Ádilhan Qýanbaev birinshi, aqtóbelik Ómirhan Jetesov pen oraldyq Sáken Janǵazıev ekinshi, taǵy bir mańǵystaýlyq Amanbek Sáýirbaev, oraldyqtar Aqmaral Kemelhanova men Gaýhar Uzaqbaı úshinshi orynǵa kóterildi. Al Bórli aýdanynan kelgen Qambar Jylqybaev, aqjaıyqtyq Ardaq Omar, atyraýlyq Bolatbek Qubashev dıplomant atandy.
Ǵ.Qurmanǵalıev atyndaǵy oblystyq fılarmonııa zalynda tanymal óner sheberleri men baıqaý jeńimpaz-júldegerleriniń qatysýymen gala-kontsert boldy.
Aıta keteıik, Marabaı Quljabaıuly atyndaǵy baıqaý 2007 jyly alǵash ret uıymdastyrylǵan bolatyn. Bıyl qaıta jalǵasyn taýyp otyr.
