Oralda jylý-qýat ortalyǵy qaryzǵa baılanysty gazsyz qaldy
ORAL. QazAqparat - Oralda jylý-qýat ortalyǵy qaryzǵa baılanysty gazsyz qaldy, dep habarlaıdy QazAqparat tilshisi.
«Jaıyqjylýqýat» AQ-dan túsken málimetke qaraǵanda, «QazTransGazAımaq» AQ-ǵa berejaǵy úshin jylý-qýat ortalyǵy keshe gazdan ajyratyldy. Osyǵan baılanysty tutynýshylarǵa ystyq sý berý de toqtatyldy.
«Jaıyqjylýqýat» AQ-ǵa turǵyndardyń bereshegi 734,6 mln teńgege jetken. Al «Jaıyqjylýqýat» AQ-nyń «QazTransGazAımaq» AQ-ǵa qaryzy 900 mıllıondaı teńgeni qurap otyr.
Mekeme bul tuıyqtan shyǵý joldaryn qarastyrýda. Sonymen qatar turǵyndardan qaryzdy óndirý jumystary da júrgizilýde.
«Jaıyqjylýqýat» AQ kestege sáıkes qaryzdy tóleýi tıis. Osy mamyr aıynyń aıaǵyna deıin tólese, gaz qaıta qosylady», dedi «QazAqparat» tilshisine bul jóninde BQO energetıka jáne turǵyn úı-kommýnaldyq sharýashylyǵy basqarmasynyń basshysy Ǵalym Orynǵalıev.
Aıta keteıik, budan buryn «Nurly jol» baǵdarlamasy aıasynda qala ortalyǵynda qos birdeı jylý magıstraliniń qaıta salynýyna baılanysty 226 úı, 29 áleýmettik nysanǵa 16 sáýirden bastap 15 qyrkúıekke deıin ystyq sý berý toqtatylǵan edi. «Jaıyqjylýqýat» AQ barlyǵy 1182 turǵyn úıdi jylýmen, sonyń ishinde 826-syn ystyq sýmen qamtamasyz etedi.
Oral jylý-qýat ortalyǵyn gazdan ajyratý ótken jyly jazda da birneshe ret oryn alǵan bolatyn.
