Oralda jylý-elektr ortalyǵynyń 11 ǵımaraty apatty jaǵdaıda tur

ORAL. QazAqparat – Oralda tehnıkalyq tekserýler nátıjesinde jylý-elektr ortalyǵynyń 11 ǵımaraty apatty jaǵdaıda ekeni anyqtaldy, dep habarlaıdy QazAqparat tilshisi.

BQO Energetıka jáne turǵyn úı-kommýnaldyq sharýashylyq basqarmasy bastyǵynyń orynbasary mindetin atqarýshy Amangeldi Ashyqovtyń Óńirlik kommýnıkatsııalar qyzmeti alańynda ótken brıfıngte málim etkenindeı, ortalyqtyń 5 óndiristik ǵımaratyn (gaz-týrbınalyq qondyrǵy, negizgi korpýs, jylý jelilerin tolyqtyrý, mehanıkalyq jóndeý sheberhanalary, qyzmettik-turmystyq korpýs) qaıta qurý jáne kúrdeli jóndeý úshin jobalaý-smetalyq qujattama ázirleýge konkýrstyq rásimder júrgizilip jatyr.

Onyń sózine qaraǵanda, joba boıynsha memlekettik saraptamanyń oń qorytyndysy alynǵannan keıin bıýdjettik ótinim respýblıkalyq qazynadan qarajat bólý maqsatynda salalyq mınıstrlikke joldanatyn bolady.

Qalǵan 6 ǵımarat boıynsha jobalaý-smetalyq qujattama ázirleý 2024 jyly bastalmaq.

«Jaıyqjylýqýat» AQ-nyń jylý jelileri 50,4 paıyzǵa tozǵan. Kúni búgin Oral qalasynda jalpy uzyndyǵy 5,6 shaqyrymdy quraıtyn №2 jáne №5 jylý magıstraldaryn qaıta jańartý úshin jobalaý-smetalyq qujattama daıyndalýda. Jalpy, Batys Qazaqstan oblysynda sondaı-aq elektr jelileri 82 paıyzǵa, sý qubyry 60,5, káriz jelileri 61,3 paıyzǵa tozǵan. 2023-2028 jyldar aralyǵynda 4 myńnan astam shaqyrym ınjenerlik jelilerdi qaıta qurý, kúrdeli jáne aǵymdaǵy jóndeýden ótkizý josparlanýda. Bıyl ınvestıtsııalar 11,7 mlrd teńge kóleminde bekitilip, 2 myńnan astam ınjenerlik jelilerdi jóndeý kózdelýde», dedi A.Ashyqov.