Oralda jyldyń úzdik sportshylary marapattaldy
ORAL. QazAqparat - Oralda jyldyń úzdik sportshylaryna qurmet kórsetildi, dep habarlaıdy «QazAqparat» tilshisi.
Jyldyń óńir sportshylary men olardyń jattyqtyrýshylary úshin jemisti aıaqtalýymen oblys ákiminiń orynbasary Ǵabıdolla Ospanqulov quttyqtap, aldaǵy jyly da jańa tabystarǵa qol jetkizýlerine tilektestigin bildirdi.
Jıynda málim etilgenindeı, batysqazaqstandyq sportshylar bıyl el namysyn abyroımen qorǵap, kóptegen tabystarǵa qol jetkizdi. Atap aıtqanda, olar álem chempıonattarynan 1 altyn, 5 kúmis, 5 qola júldemen oralsa, halyqaralyq týrnırlerde 12 altyn, 14 kúmis, 33 qola medaldi jeńip aldy. Álem kýbogy kezeńderinde 3 altyn, 4 kúmis, 3 qola, Azııa birinshilikterinde 4 altyn, 4 kúmis, 8 qola júldege ıe boldy. Sondaı-aq el chempıonattarynda 158 altyn, 159 kúmis, 199 qola medaldi qanjyǵalaryna baılady.
Elbasynyń qalyń buqarany sportpen aınalysýǵa tartý jónindegi tapsyrmasyna sáıkes salaýatty ómir saltyn ornyqtyrý maqsatynda 136633 adam qatysqan 2665 is-shara uıymdastyryldy. Sonyń ishinde 7 QR chempıonaty, 8 respýblıkalyq, 4 halyqaralyq týrnır, úsh sport túrinen QR ІV jastar sporttyq oıyndar ótkizildi.
Qazirdiń ózinde 2018 jyly Phenchhan qalasynda ótetin HHІІІ qysqy olımpıada oıyndaryna qos birdeı batysqazaqstandyq sportshy joldama alyp otyr. Olardyń qatary áli de tolyǵady degen úmit bar.
Sonymen sportshylardy baptaýdaǵy eńbegi úshin sambo kúresinen BQO jáne QR quramasynyń aǵa bapkeri, Qazaqstannyń eńbek sińirgen jattyqtyrýshysy Raıbek Meńdiǵalıev, baıdarka men kanoe esýden BQO jáne QR quramasynyń aǵa bapkeri, Qazaqstannyń eńbek sińirgen jattyqtyrýshysy Aleksandr Akýnıshnıkov, shahmattan halyqaralyq dárejedegi tóreshi Valerıı Mın, qol kúresinen jáne gir sportynan oblys quramasynyń aǵa bapkeri Murat Ibatov, ulttyq at sporty túrlerinen BQO quramasynyń aǵa jattyqtyrýshysy Aqtilek Sársenov oblys ákiminiń alǵyshatymen marapattaldy.
QR Ulttyq sport túrleri qaýymdastyǵynyń «Altyn tuǵyr» júldesi aýdaryspaqtan elimiz boıynsha bıylǵy jyldyń úzdik sportshysy Narmaǵanbet Imanǵazyulyna tabys etildi. Qol kúresinen Azııa chempıonatynyń qola júldegeri, jastar arasynda álem birinshiliginiń jeńimpazy Kenjeqyz Qaýpenova «Jyl serpilisi» atalymy boıynsha úzdik shyqty.
Áskerı sambodan bıylǵy V Azııa oıyndarynyń kúmis jáne álem chempıonatynyń qola júldegeri Temirlan Ihsanǵalıev, áskerı sambodan álem chempıonatynyń qola júldegeri Bolatbek Raıymqulov jáne sambodan jastar arasynda Azııa jáne álem birinshilikteriniń qola júldegeri Armat Qabdolovty daıyndaǵany úshin, ókinishke qaraı, taıaýda kenetten dúnıeden ozǵan Qazbek Ibrashev «Jyl jattyqtyrýshysy» bolyp tanyldy.
QR V paraspartakıadasynyń kúmis júldegeri Sandýǵash Baımuqanova «Paralımpıadalyq sport túrlerinen úzdik sportshy», toǵyzqumalaqtan eresekter arasynda álem chempıonatynyń kúmis júldegeri Saılan Matylov «Ulttyq sport túrlerinen úzdik sportshy», áskerı sambodan erler arasynda álem chempıonatynyń qola júldegeri Bolatbek Raıymqulov «Olımpıadalyq emes sport túrlerinen úzdik sportshy» atalymyna ıe boldy. Sondaı-aq qazir shetelde jattyǵyp júrgen short-trekten HHVІІІ qysqy dúnıejúzilik ýnıversıadanyń jáne VІІ qysqy Azııa oıyndarynyń qola júldegeri Anıta Nagaı «Qysqy sport túrlerinen úzdik sportshy», baıdarka men kanoe esýden QR ІV jastar sporttyq oıyndary men eresekter arasynda Azııa chempıony Andreı Ergýchev «Jazǵy olımpıadalyq sport túrlerinen úzdik sportshy» atandy.
«Úzdik sporttyq aýdan» atalymymen bıyl «Aq bıdaı» oblystyq VІ aýyl sporty oıyndaryn joǵary deńgeıde uıymdastyrǵany úshin Zelenov aýdany ákimdigi marapattalsa, «Qazaqstan» RTRK» AQ BQO fılıaly «Úzdik buqaralyq aqparat quraly» atandy.
