Oralda júrip bara jatqan avtobýstan órt shyqty
ORAL. QazAqparat - Órt shyqqan kezde avtobýs salonynda 30 adam bolǵan, dep habarlaıdy QazAqparat «Moı GOROD» portalyna silteme jasap.
№22 avtobýs 12 maýsym kúni keshke órtene bastaǵan. Qoǵamdyq kólik aıaldamadan júrip bara jatqan kezde motordan órt shyqqan. Avtobýstyń salonynda 30 adam bolǵan.
BQO TJD bas mamany Nuraly Mýsıevtiń aıtýynsha, «Daewoo» markaly avtobýs jolýshylardy tasymaldaǵan.
«Órt sóndirý qyzmetine 19.30-da habar tústi. Avtobýs 5-7 mınýtta tolyqtaı janyp ketip, jaqyn mańdaǵy janarmaı quıý beketin sharpýy múmkin edi. Degenmen, órt sóndirýshilerdiń shuǵyl áreket etýiniń arqasynda tilsiz jaý 19.44-te sóndirildi. Eshkim zardap shekken joq», - dedi Nuraly Mýsıev.
Aıta ketken jón, oqıǵa ornynda 5 órt sóndirýshi men 1 tehnıka jumys istedi. Órttiń shyǵý sebebi anyqtalyp jatyr.
