Oralda júrgizýshilik quqyǵynan aıyrylsa da, rýlge otyrǵan muǵalim áıelge aıyppul salyndy

ORAL. KAZINFORM — Oral qalasynda № 42 orta mekteptiń muǵalimi ákimshilik jaýapkershilikke tartyldy.

BQO sotynyń baspasóz qyzmetinen málim etkenindeı, buǵan deıin ol mas kúıinde kólik júrgizgeni úshin júrgizýshi kýáliginen aıyrylǵan bolatyn. 

Soǵan qaramastan, áıel taǵy da rýlge otyrǵan — bul joly ishimdik ishpegen, biraq Qazaqstan Respýblıkasynyń aýmaǵynda tirkelmegen avtokólikti basqarǵan.

- Іsti qaraý nátıjesinde muǵalim QR Ákimshilik quqyq buzýshylyq týraly kodeksiniń 612-baby 3-bóligi (júrgizý quqyǵynan aıyrylǵan adamnyń kólik basqarýy) jáne 590-baby 1–2-bólikteri (kólik quraldaryn tirkeý erejelerin buzý) boıynsha kináli dep tanyldy. Aıyppul mólsheri — 275 240 teńge. Jaza taǵaıyndaý kezinde kinásin moıyndaýy, ókinish bildirýi jáne jaýaptylyqty aýyrlatatyn mán-jaılardyń bolmaýy eskerildi. Qaýly zańdy kúshine engen joq, - dep habarlady vedomstvodan. 

Eske sala keteıik, budan buryn batysqazaqstandyq ata-ananyń 25 jyldan keıin amerıkalyqtar asyrap alǵan qyzymen kezdeskenin jazǵan edik.