Oralda júrgizýshiler suıytylǵan gaz tapshylyǵyna tap boldy

ORAL. KAZINFORM – Oral qalasyndaǵy avtogaz quıý stansalarynda kezek qalyptasty. Avtokólik júrgizýshileri óńirde suıytylǵan gaz tapshylyǵynyń jyl saıyn osylaı qaıtalanatynyn jetkizdi.  

BQO energetıka jáne turǵyn úı-kommýnaldyq sharýashylyq basqarmasynyń basshysy Mıras Múlkáıdiń Kazinform tilshisine málim etkenindeı, bıylǵy ekinshi toqsanǵa suıytylǵan munaı gaz jetkizý josparyna sáıkes oblys úshin «Jaıyqmunaı» JShS kózderinen maýsym aıyna 3 545 tonna qarastyrylǵan.

Mıras Rústemulynyń sózine qaraǵanda, 14 maýsymnan 24 shildege deıin Pavlodar munaıhımııa zaýytyn josparly jóndeý jumysy júrgizilip jatyr. Soǵan baılanysty QR Energetıka mınıstrligimen óńirlerdiń bir bóligi aýmaqtyq erekshelikterine qaraı zaýyttarǵa qaıta bólingen. Negizgi jospardyń oryndalýy – 100 paıyz.

Basqarma basshysynyń aıtýynsha, 21 maýsymda QR Energetıka mınıstrligi aımaqtaǵy suranysty qanaǵattandyrý úshin «Jaıyqmunaı» JShS kózderinen qosymsha 324 tonna suıytylǵan munaı gazyn bóldi. Sondaı-aq 23 maýsymda «SNPS-Aqtóbemunaıgaz» AQ-dan temir jol kóligimen qosymsha 468 tonna qarastyryldy. 

– Qazirgi kezde suıytylǵan gazdy oblys sýbektilerine jóneltý bastaldy. Búginge 200 tonna josparlanǵan. Oǵan qosa «SNPS-Aqtóbemunaıgaz» AQ-dan 26 maýsym kúni Batys Qazaqstan oblysy úshin 7 vagon nemese 256 tonna suıytylǵan munaı gazy jóneltilmekshi. Taıaýda oblystyń ishki naryǵynda jaǵdaıdy turaqtandyrý kózdelip otyr, - dedi M.Múlkáı.

Eske sala keteıik, budan buryn Batys Qazaqstanda suıytylǵan gaz tapshylyǵy týyndaǵanyn jazǵan edik.

Sondaı-aq júrgizýshi Oralda avtogazdyń birde bar, birde joq ekeni týraly aıtty.