Oralda júrgizýshi mas kúıde qaqqan 14 jastaǵy qyz jansaqtaý bólimine tústi

Oralda júrgizýshi mas kúıinde avtokóligimen qaǵyp ketken 14 jastaǵy qyz jansaqtaý bóliminde jatyr, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkendeı, oqıǵa 17 qyrkúıek kúni Oral – Bortaý tas joly boıynda bolǵan.

«1971 jylǵy júrgizýshi mas kúıinde «Renault Duster» avtokóligimen kele jatyp, Oral qus fabrıkasy aýdany «Shlagbaým» aıaldamasy tusynda belgilenbegen jol ústimen júrip ótpekshi bolǵan 14 jastaǵy qyzdy qaǵyp ketken. Jol apaty saldarynan aýyr jaraqat alǵan jasóspirim aýrýhanaǵa jatqyzyldy. Atalǵan derek boıynsha QR QK-niń 345-1-babyna (alkogoldik, esirtkilik jáne (nemese) ýytqumarlyq masań kúıde kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) sáıkes sotqa deıingi tergeý jumystary bastaldy», - dep habarlady vedomstvodan.

BQO densaýlyq saqtaý basqarmasy baspasóz qyzmetiniń naqtylaýynsha, qazir qyz oblystyq kópbeıindi balalar aýrýhanasynyń jansaqtaý bóliminde. Jaǵdaıy óte aýyr.

Eske sala keteıik, budan buryn BQO-da jantúrshigerlik jol apatynan qaza tapqan 6 adam bir otbasynyń múshesi ekenin jazǵan bolatynbyz.