Oralda júrgizýshi saıajaı aýmaǵyna 6 tonnaǵa jýyq sıyr terisin túsirip ketken
ORAL. QazAqparat - Oralda iri qara terisin saıajaı aýmaǵyna túsirip ketken júrgizýshi jaýapqa tartyldy, dep habarlaıdy QazAqparat tilshisi.
Batys Qazaqstan oblystyq polıtsııa departamentiniń baspasóz qyzmetinen alynǵan málimetke qaraǵanda, 17 qańtar kúni saǵat 13.59-da áıel adam belgisiz bireýdiń «Orbıta» saıajaı qoǵamdastyǵy aýmaǵyna iri qara terisin túsirip ketkendigin habarlaǵan.
Oqıǵa ornyna Abaı polıtsııa bóliminiń ýchaskelik ınspektorlary baryp, beınebaqylaý kamerasynyń kómegimen avtokólikti, sodan keıin júrgizýshini anyqtady.
Málim bolǵanyndaı, 13 qańtar kúni tún ortasynda Oral qalasynda turatyn 1989 jylǵy júrgizýshi «KamAZ-5511» avtokóligimen salmaǵy shamamen 5-6 tonnadaı sıyr terisin túsirip, taıyp turǵan.
Qazirgi kezde atalmysh júrgizýshi QR Ákimshilik quqyqbuzýshylyq kodeksiniń 505-babyna (qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý) sáıkes ákimshilik jaýapkershilikke tartyldy.
Aıta keteıik, ótken jyly oblys boıynsha osy bapqa sáıkes 3927 zańbuzýshylyq belgili boldy. Al Oral qalasy polıtsııa basqarmasy jedel basqarý ortalyǵynyń málimetine sáıkes beınebaqylaý kameralarynyń kómegimen 2018 jyly 16104 ákimshilik quqyqbuzýshylyqtyń joly kesildi.
