Oralda júrgizýshi Leksýspen polıtsııa qyzmetkerlerinen qashyp, kisi qaǵyp ketti
ORAL. QazAqparat – Oralda «Lexus» markili kóligimen polıtsııa qyzmetkerlerinen qashyp, kisi qaqqan júrgizýshi ustaldy, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń aıtýynsha, oqıǵa 16 sáýir kúni túngi saǵat 23.19-da qalaǵa qarasty Derkól aýylynda boldy.
1987 jylǵy S. degen azamat jalǵan memlekettik nómir taǵyp, «Leksýs LH 470» avtokóliginiń rýline otyrǵan. Polıtsııa qyzmetkerleriniń «Toqta!» degen zańdy talabyna baǵynbaı, qashqan sátte ol rýlge ıe bola almaı, óz avtokóliginiń janynda turǵan 1987 jylǵy M. degen azamatty qaǵyp ketken.
Polıtsııa qyzmetkerleri quqyq buzýshyny sol jerde qolǵa túsirdi.
Júrgizýshige qatysty QR Ákimshilik quqyqbuzýshylyq kodeksiniń 610-baby 1-bóligi (múlikterdiń búlinýine alyp kelgen, materıaldyq zalal keltirgen kólik quraldary júrgizýshileriniń jol júrisi qaǵıdalaryn buzýy), 613-baby 1-bóligi (polıtsııa qyzmetkeriniń kólik quralyn toqtatý týraly zańdy talabyn oryndamaý), 590-baby 3, 4, 5-bólikteri (kólik quraldaryn paıdalaný qaǵıdalaryn buzyp, jalǵan memlekettik nómir taǵyp, aıdaý) jáne 476-baby 6-bóligi (tótenshe jaǵdaı rejımin buzý) boıynsha hattama toltyryldy.
«Júrgizýshige qatysty júrgizilgen medıtsınalyq kýálandyrý qorytyndysy 0,44 promıldi kórsetken, ol alkogoldik mas bolyp sanalmaıdy. Sondyqtan qosymsha saraptama taǵaıyndaldy. Avtokólik arnaıy turaqqa qoıyldy. Avtokólik qaqqan azamat ishtiń jabyq jaraqaty dıagnozymen oblystyq aýrýhanaǵa jatqyzyldy», dedi QazAqparat tilshisine B.Belgibekov.
