Oralda júrgizýshi kýáligi joq azamat rýlge otyryp, baǵanǵa soǵylǵan
ORAL. QazAqparat - Oralda sońǵy kezde oryn alǵan jol-kólik oqıǵalary boıynsha tergeý júrgizilýde, dep habarlaıdy QazAqparat tilshisi.
BQO ishki ister departamentiniń baspasóz qyzmetinen habarlaǵandaı, 8 shilde kúni saǵat 22.00 shamasynda júrgizýshi jol qaýipsizdigin saqtamaı, «VAZ-2106» avtokóligimen Eýrazııa dańǵyly boıynda ǵylymı-tehnıkalyq kitaphana aıaldamasy tusyndaǵy rettelmeıtin jaıaý júrginshi jolaǵymen ótip bara jatqan eki adamdy qaǵyp ketken.
Sonyń saldarynan túrli jaraqat alǵan qos júrginshi qalalyq aýrýhanaǵa jatqyzyldy.
Bul oqıǵa boıynsha qalalyq ishki ister basqarmasy QR QK 345-baby 2-bóligine sáıkes («Abaısyzda adamnyń aýyr dene jaraqatyn alýyna soqtyrǵan jol qozǵalysy erejesin buzý») sotqa deıingi tergeý amaldaryn júrgizýde.
10 shilde kúni saǵat 04.30 shamasynda «Mazda» avtokóliginiń júrgizýshisi Gagarın kóshesimen kele jatyp, rýlge ıe bola almaı, №22 mektepke qarama-qarsy bettegi elektr baǵanyna soǵylǵan.
Júrgizýshi túrli jaraqatpen qalalyq aýrýhanaǵa jetkizildi.
Bir «qyzyǵy», bul turǵyn kólik júrgizý quqyǵynan aıyrylsa da, rýlge otyrǵan. Abyroı bolǵanda, ózinen basqa eshkim zardap shekken joq.
Bul derek boıynsha QR QK 345-baby 1-bóligine sáıkes («Kólik quralyn basqarý quqyǵynan aıyrylǵan bolsa da, kólik basqarý») qylmystyq is tergelýde.
Eske sala keteıik, budan buryn Oralda avtokóliktiń eki adamdy qaǵyp ketkenin jáne taǵy bir avtokóliktiń baǵanǵa soǵylǵanyn jazǵan bolatynbyz.
