Oralda júrgizý quqyǵynan aıyrylǵan adam taǵy da mas kúıinde jol apatyn jasady
ORAL. QazAqparat – Oral qalasynda mas júrgizýshiniń kesirinen jol-kólik oqıǵasy boldy, dep habarlaıdy QazAqparat tilshisi.
BQO polıtsııa departamenti baspasóz qyzmetiniń jetekshi mamany Móldir Sadyrǵalıevanyń aıtýynsha, atalǵan júrgizýshi budan buryn mas kúıinde avtokólik júrgizgeni úshin júrgizýshilik quqyǵynan aıyrylǵan.
Soǵan qaramastan, 54 jastaǵy júrgizýshi mas kúıinde qaıta rýlge otyrǵan.
Ol «VAZ-2107» avtokóligimen Jáńgir han kóshesinde retteletin jaıaý júrginshi ótkeli aldynda «Aýdı A-6» avtokóligimen soqtyǵysqan. Sosyn sonyń aldyndaǵy «Lada Prıorany» da «qur qaldyrmaǵan».
Medıtsınalyq kýálandyrýǵa sáıkes 54 jastaǵy júrgizýshiniń mas bolǵany anyqtaldy. Ol ýaqytsha ustaý ızolıatoryna qamalyp, avtokóligi arnaıy turaqqa qoıyldy.
Qazirgi kezde QR QK 346-baby 2-bóligine (kólik quralyn basqarý quqyǵynan aıyrylǵan jáne alkogoldik masań kúıde kólik quralyn basqarý) sáıkes sotqa deıingi tergeý amaldary júrgizilýde.
Eske sala keteıik, budan buryn Batys Qazaqstanda avtokólik aýdarylyp, 31 jastaǵy jolaýshynyń mert bolǵanyn jazǵan edik.
